खुराक

नर्मदेश्वर प्रधान

खँयाखँय्
थौकन्हय् सिनेस्टारतसें बजाः कयाच्वंगु दु। अखबार, म्यागेजिन फुक्कभनं इमिगु छुं न छुं चर्चा दयाच्वनी। विज्ञापनय् इपिं खने दयाच्वनी। देशय् साहित्यकार, कलाकार, बुद्धिजीवीवर्ग नं दु। तर सिने हिरो-हिरोइनतसें मेडियाय् गुलि थाय् काइ मेपिंसं काये फइ मखु। हिरो-हिरोइनत नं कलाकार खः। इमिसं फिल्मय् क्यंगु विशेषता, खुबीया चर्चा जुइमाः। योग्यता, गुणया कदर जुइमाः। पक्का। तर सिने हिरोहिरोइनतय् चर्चा अक्सर इमि कलाकारिताय् केन्द्रित मजू। सेलिबेटिया नामय् थुमिसं जनतायात फेशन, श्रृंगार, रंगीन जीवनया लिधंसाय् प्रभावित यायेत स्वइ। सिने हिरो हिरोइनतसें थःगु आर्कषण थःपिनि फेशन व रवाफं थनेत स्वइ ।

पत्रपत्रिकाय् सिने हिरो-हिरोइनतय् अन्तर्वार्ता ब्वने। गुलि बजे द्यनेगु? ब्रेकफास्टय् छु नयेगु? छु पाउडर छ्यलेगु? गुगु मोबाइल ज्वना जुइगु? हिरो-हिरोइनतय्त थज्याःगु न्ह्यसः तइ। इमिसं शान्दार लिसः बी। मानौ इमि लिसः तसकं हे अनुकरणीय। शिक्षाप्रद। अखबार पत्रिकातसें इमिगु लिसः ब्वइ। प्रचार याइ। इमिगु लिसः तःधंगु उपलब्धी खः। भ्रम थनी। पत्रपत्रिकां बिक्री बजार अप्वयेकेगु लागिं सिने कलाकारतय्त कामुक मुद्राय् ब्वइ। हिरोइनतय् अंग प्रदर्शन पत्रिकातय् मसला जुया बी। युवातय्त थ्व "आइ सेक्स"या साधन जुया बी ।

जिं सिनेमा मस्वया। सिनेमा स्टारत प्रति जि अभिरुचि मदु। नेपाली फिल्म जिं स्वयागु हे मदु। नेपाली हिरो-हिरोइनतय् चर्चा छाय् जुइगु खः? जिं मथू। थ्व जिगु व्यक्तिगत खँ खः। झ्यानतय् निंतिं हिरो-हिरोइनत द्यः हे जुइ। तर सामान्य जिज्ञासा लुइ। सिने हिरो-हिरोइनतय् चर्चा, सरोकारया आम जनताया सन्दर्भय् औचित्य छु? सुथ, बहनी छु नया? न्यनेमाःपिं खास मनूत, वर्ग यक्वं दु। छाय् न्ह्यः मवल? चिउताः तयेमाःपिं असंख्य जनता दु। सार्वजनिक सरोकारया मार्मिक न्ह्यसःत छाय् कुण्ठित जुइ थौं? पत्रपत्रिकातसें "रिल" नायक-नायिका तय् अर्थहीन, व्यक्तिगत खँय् जनतायात छाय् भुले यानाच्वनी? कथाकारं बाखं च्वइ। समाज ब्वइ। उपन्यासकारं उपन्यास च्वइ। जीवन ब्वइ। कविं कविता च्वइ। कटु सत्यतथ्य उली। तर थुमि चर्चा मेडियां गुलि हइ। छम्ह मुर्धन्य कविं ब्रेकफास्टय् छु नइ? व गुबेती द्यनी? गुबलय् दनी? थुज्वःगु न्ह्यसः जनआकर्षणया विषय छाय् जुइ मफुत? समाज थौं गुखेर न्ह्याः वनाच्वन? मेडियां जनताया आमरुचियात गन यंकाः न्याकेत स्वयाच्वन। स्पष्ट जुइ। सिने हिरो-हिरोइनतसें हनाच्वंगु रंगीचंगी जीवन शैली आम जनताया यथार्थ जीवनया किचः मखु। बरु जनतायात यथार्थ स्थिति त्वपुइगु व बुट्टादार पर्दा जुइ ।

सुं सिने हिरो अविवाहित जुइ। वं छाय् ब्याहाः मयाःगु? पत्रपत्रिकाय् तःधंगु न्ह्यसः जुया बी। थुज्वःगु न्ह्यसःयात कयाः पत्रपत्रिकां यक्व मसी खर्च याइ। लगानी याइ। देशय् अनेक महत्वपूर्ण, अहम-गहन न्ह्यसःत दु। कलम, मसी छ्यलेमाःगु समस्यात दु। राजेश हमालया ब्याहा छाय् मजुल? थौंकन्हय् पत्रपत्रिकातसें देशया तःधंगु चिन्ताया विषय थें ब्वइ। ब्याहाः मयाःपिं नेतात नं दइ। राजनैतिक गतिबिधिइ व्यस्तताया कारणं ब्याहा मजुल। गुलिं नेतातसें कनी। सिने कलाकार, राजेश हमाल सिनेमाय् ब्याहाया सिन बिबिउँ हे वया ब्याहा याये मलानाच्वन जुइमाः। हिरो-हिरोइनतय् ब्याहाया छु भुख्खा। तर छम्ह सिने हिरोनं ब्याहा मयायेवं सर्गः हे कुतुंवइ थें पत्रपत्रिकां चर्चा याइ। आर्श्चय !

उबलय्। सिने हिरो। भुवन केसी। निम्ह कलाः चाःहिकाच्वंगु ई। छगू एफएम कार्यक्रम। बहुपत्नी बारे वय्कःया अनूभुतियात कयाः न्ह्यसः तइ। वय्कलं लिसः बी "मनूत जिथाय् वइ। अनेक शंका यानाः। तर जि निम्ह तिरिमय्जुपिं मिले जूगु खनाः अजुचाइ।" उबलय् वय्कलं बियादीगु लिसः बहुपत्नीया निंतिं प्रेरणा जुइ। लिपा वय्कःया बहुपत्नीया चरण फुइ। पत्नीविहिन अवस्थाय् वइ। आः हानं मेडियां वय्कःया गर्लफ्रेन्ड चर्चा हइ। थौं सिने हिरो-हिरोइनत यक्व मनूतय् निंतिं रोलमोडल कथं प्रस्तुत जू। थ्व सिने हिरो-हिरोइनतय् थज्याःगु चर्चायात गय् थुइकेगु? थ्व विषयय् जनता दथुइ वातार्, विमर्श न्ह्याकेमाः ।

छम्ह। ह्ष्टपुष्ट। सदाबहार हिरोइन। हिरोइन मय्जुं थःगु दुरुपाय् टाटु की। मय्जुया दुरुपाय् च्वंगु टाटुया किपा अखबारय् वइ। थौंकन्हय् टाटुया चलन वयाच्वन। टाटु गन कीगु? थाय्, बेथाय्, कुथाय्। अन्तर मदयेधुंकल। दुरुपाय् टाटु कीगु व कर्ताया स्वतन्त्रताया खँ खः। उकी कपाः स्याके माःगु मदु। तर उज्वःगु चित्र प्रचारय् हइ। मेडियां जनतायात छु सन्देश बीत स्वः खः? छु प्रचार यायेत्यंगु खः? सिने हिरो-हिरोइनतय्सं न्ह्यागु याःसां बांलाः। अनुकरणीय जुइ धायेत्यंगु जुइमाः ।

सम्भवतः सिने हिरोइनतसें टाटुयात ब्रेसियर, प्यान्टी, कट्टु कथं नं छय्ली तिनि। उबलय् मेडियायात व फुक्क पोषक खुराक जुइ। थुकी शंका मदु ।