तीनकुने-सूर्यविनायकया खुगू लेन सतकया उलेज्या

जापन सरकारया ग्वाहालिइ येँया तीनकुनेनिसें ख्वपया सूर्यविनायकतकया खुगू लेन सतकया थौं उलेज्या जुल । प्रधानमन्त्री झलनाथ खनाल व नेपाःया निंतिं जापनया राजदूत तात्सुओ मिजुनों मंकाः कथं उगु सतकया उलेज्या याःगु खः ।

जापान सरकारया छगू अर्ब ७७ करोड पूर्ण अनुदान व नेपाः सरकारया ४० करोड लागतय् २०६५ सालनिसें उगु सतक खण्ड निर्माण ज्या सुरु जूगु खः । कोटेश्वरं निसें मनोहरा खुसि, मनोहरानिसें हनुमन्ते व हनुमन्तेनिसें सूर्यविनायकतक यानाः स्वंगू खण्डय् विभाजित थुगु सतकता लम्बाई ९.१ किलोमिटर दु ।

उगु सतकय् प्यंगू लेनय् गाडी चलेजुइगु व निगू सर्भिस ट्रयाक कथं खुगू लेनया सतक निर्माण याःगु खः ।