संविधान सुनिश्चिताया निंतिं माओवादीं जनपरिचालन याइगु
शान्ति व संविधानयात सुनिश्चित यायेगु निंतिं दबाव बीत एकीकृत नेकपा (माओवादीं) जनपरिचालन याइगु जूगु दु ।
मंगलवाः च्वंगु माओवादी पदाधिकारीतय् मुँज्यां शान्ति व संविधान निर्माण विरुद्ध षड्यन्त्र जुयाच्वंगु धासें जनपरिचालनया ज्याझ्वः सार्वजनिक याःगु दु । माओवादीं जेठ १ गते निसें १० गते तक थःगु मार्फतया फुक्कं जनवर्गीय संगठनयात परिचालन यायेगु व देय्न्यंक आमसभा याइगु जूगु दु ।
माओवादीं जनकपुर, घनगढी, विराटनगर, पोखरा धुंकाः दकलय् लिपा जेठ १० गते येँय् आमसभा याइगु जूगु दु । येँय् जुइगु सभायात पार्टी नायः पुष्पकमल दाहाल 'प्रचण्डं' सम्बोधन यायेगु क्वःछिउगु दुसाः जनकपुरय् न्वकु डा. बाबुराम भट्टराई, धनगढीइ न्वकु नारायणकाजी श्रेष्ठ, पोखराय् मू छ्याञ्जे रामबहादुर थापा 'बादल' व विराटनगरय् छ्याञ्जे सिपी गजुरेलं सम्बोधन याइगु ज्याझ्वः दु ।
उखे थौंया मुँज्यां सरकारय् वनीपिं मन्त्रीतय् नां धाःसा ल्यये मफुत । मुँज्यां मन्त्रीतय् नां ल्ययेगु जिम्मा पार्टी नायःयात बिउगु दु । मुँज्यां प्रचण्डयात कन्हय् तकया दुने नां क्वःछिना प्रधानमन्त्रीयात लःल्हायेगु जिम्मा बिउगु दु ।
