चिनियाँ राजदुतया नं सक्रियता अप्वल
न्हूगु सरकार गठन यायेत थीथी दलत सहलह यायेगु झ्वलय् व्यस्त जुयाच्वंगु ईलय् नेपाः स्थित थीथी देय्या राजदूततय् सक्रियता नं अप्वःगु दु । थ्वहे झ्वलय् थौं कन्ह्य चिनियाँ राजदूतं नं कुटनीतिक सक्रियता अप्वेकूगु दु ।
नेपाःया लिपांगु राजनीतिक घटनाक्रमया बारे सहलह यायेत चिनियाँ राजदुत कु गोहाङं बिहिवाः सुथय् प्रमुख प्रतिपक्षि दलया नेता व नेपाली कांग्रेसया सभापति गिरिजाप्रसाद कोइरालायात नापलानादीगु दु । कोइराला निवास महाराजगंजय् जूगु खँल्हाबंलाय् नेपाःया लिप्पांगु घटनाक्रमया बारे सहलह यानादीगु खः ।
मेगू देय्या अन्तरिक मामिलाय् हस्तक्षेप मयायेगु निति नाला वयाच्वंगु चीनया राजदुत गुहाङं बुधवाः कामचलाउ प्रधानमन्त्री पुष्पकमल दाहाल प्रचण्डयात नापलानादीगु खः । प्रधानमन्त्री निवास बालुवाटारय् जूगु खँल्हाबंलाय् लिप्पांगु राजनीतिक अवस्था, न्हूगु सरकार गठन, शान्ति पक्रियाया निरन्तरता लगायत विषलय् प्रधानमन्त्री नाप च्यूताः प्वंकादीगु खः ।
अथेहे मंगलवाः हे एमालेया अध्यक्ष झलनाथ खनाल नाप नं वयेकया हे छेँय् वनाः नापलानादीगु खः । खनालयात नापलायेवं वयेक एमालेया प्रभावशाली नेता केपी शर्मा ओलीयात नं नापलानादीगु खः ।
सरकार गठन यायेत थःथःगु हे कुतः न्ह्याकाच्वंगु दलत व थीथी कुटनीति नियोकया दुजःतय् सक्रियाता नापं चिनियाँ राजदुतया थ्व सक्रियता यात अर्थपूर्ण रुपं काःगु दु ।
