नारावाजीया दथुइ बजेट अधिवेशन सुरु
थनिंनिसें व्यवस्थापिका संसदया बजेट अधिवेशन सुरु जूगु दु । अधिवेशन सुरु जुइवं चिधंगु दलया प्यम्ह सभाससद्य्सं नाराबाजी नं सुरु याःगु खः । अधिवेशन सुरु जूगु पौ हे ब्वने मलायेकं नाराबाजी मयायेत सभामुख सुभाषचन्द्र नेम्वाङं इनाप याःसां प्यम्ह सभासद्तय्सं होहल्ला यानाच्वंगु खः ।
निरन्तर रुपं होहल्ला जुइवं सभामुख नेम्वाङं नाराबाजीया दथुइ हे राष्ट्रपति डा. रामवरण यादवं बजेट अधिवेशन सुरु जूगु धकाः छ्वयादीगु पौ ब्वनान्यंकूगु खः । प्यम्ह सभासद्तय्सं हिउँदे अधिवेशनय् नं नाराबाजी यायेवं होहल्लाया दथुइ हे सभामुखं अधिवेशन क्वचाःगु घोषणा यानादीगु खः ।
दलित जनजाति पार्टीया सभासद् विश्वेन्द्र पासवान, संघीय लोकतान्त्रिक राष्ट्रिय मञ्चया रुक्मणी चौधरी, नेपाः राष्ट्रिय पार्टीया बुद्ध साय्मि व स्वतन्त्र सभासद् सरदुल मियाँ हकं न्हूगु संविधानय् आदिवासी जनजाति, दलित लगायत मुस्लिमतय् हक अधकार सुनिश्चित यायेमाःगु माग यासें नाराबाजी यानावयाच्वंगु दु ।
व्यवस्थापिका संसदया मेगू मुँज्या बैशाख २५ गते न्हिनसिया ३ बजेतकया निंतिं स्थगित याःगु दु ।
