स्वंगू तहया राज्य संरचना प्रस्ताव
राज्यया पुर्नसंरचनाय् विशेष लागाः सहित राज्याय् स्वंगू तहया स्वरुप जुइमाःगु खँय् सभासदत सहमत जूगु दु । संविधानसभाया राज्य पुर्नसंरचना व राज्य शक्ति बाँडफाँड समितिया सभासदतय् बुधवाः जूगु बैठकय् विशेष लागाःया व्यवस्था सहित केन्द्र, प्रदेश व स्थानीय यानाः स्वंगू तकलय् संरचना जुइगु खँय् सहमत जूगु दु ।
संविधनसभाय् न्ह्यब्वय्त विषयगत अवधारणा व मस्यौदा देयेकेत समितिं बुधवाः निसें बुदाँगत सहलह न्ह्याकूगु दु । मधेशवादी दलया सभासदतयसं निगू तहया जक संरचना जुइमा:गु व वहे कथं स्थानीय तह दुथ्याके फइगु तर्क तःसां नं लिपाः सहलह यानाः सहमति जूगु खः ।
सहमति कथं विशेष लागाःया व्यवस्था अन्तर्गत संरक्षित, स्वायत्त व विशेष लागाः यानाः स्वंगू कथंया स्थानीय लागाः देयेके फइ । उकी अल्पसंख्य, जातीय, भाषिक सघनता वा मेगू छुं कारणं विशेष प्राथमिकता वा व्यवस्था यायेमाःगु लागाःयात उगु व्यवस्था अन्तर्गत तइगु जूगु दु ।
समितिं राज्य निर्माणया आधारत सम्बन्धि बिहिवाः निसें सहलह याइगु जूगु दु । संविधान सभाया कार्यतालिका कथं जेठ ८ गतेनिसें विषयगत समितितय् अवधारणा व मस्यौदा न्ह्यब्वयेगु खँ न्ह्यथंनातःगु खः ।
