झापाया गांगामय् नेवाः मिसा पुचः
झापा (सन्ध्याटाइम्स)/झापाया नेवाः पुचः सुरुङ्गाया पहलय् नेवाः मिसा पुचः स्वनेगु ज्या जूगु दु। नेवाः पुचःया अध्यक्ष रतन कुमार श्रेष्ठया सभापतित्वय् जूगु मुँज्यापाखें उगु पुचः स्वंगु खः ।
ज्याझ्वलय् मूपाहां कथं झाःम्ह नेवाः देय् दबू झापाया नायः कृष्ण उदासं नेवाः देय् दबूया उद्देश्ययात पूवंकेगु लागिं झापाया गांगामय् नेवाः पुचःत गठन यायेगु ज्याय् थःपिं लगे जुयाच्वनागु खँ कनादिल। विशेष पाहां कथं नेवाः मिसा दबू शान्तिनगरया नायः निलम श्रेष्ठं नं झाःगु खः। वय्कःपिंसं थथे गांगामय् मिसा पुचः गठन यानाया कारण न्ह्यःने वयाच्वंगु राष्ट्रिय जनगणनायात सफल यायेगु व सकलें नेवाःतय् पाय्छि ल्याः पिकायेगु खः धयादिल ।
मय्जु वर्षा श्रेष्ठया अध्यक्षताय् गठन याःगु उगु समितिइ न्वकु देउमाया श्रेष्ठ, छ्यांज्ये देवीमाया श्रेष्ठ, लिउछ्यांज्ये दुर्गा श्रेष्ठ व दांभरि जमुना श्रेष्ठ च्वनादीगु दुसा दुजलय् जितकुमारी श्रेष्ठ, तिलमाया श्रेष्ठ, देवी श्रेष्ठ, सरस्वति श्रेष्ठ, गोमा श्रेष्ठ व सिना श्रेष्ठ च्वनादीगु दु ।
अथे हे झापाया हे नेवाः खलः धुलावारीया ग्वसालय् नेवाः मिसा दबू गठन यायेगु ज्या नं जुल। नेवाःखलः धुलावारीया नायः सनदकुमार जोशीया सभापतित्वय् जूगु उगु ज्याझ्वलय् नेवाः देय् दबूया संगठन विभाग संयोजक गंगादेवी श्रेष्ठ वरिष्ठ पाहां कथं झाःगु खः। उगु हे मुँज्यां सुशीला श्रेष्ठया अध्यक्षताय् नेवाः मिसा दबू स्वनेज्या नं जुल। उकिया न्वकु कलिला श्रेष्ठ, छ्यांज्ये देवीका शाक्य, लिउ छ्यांज्ये रोमीसा श्रेष्ठ, दांभरि मधु श्रेष्ठ च्वनादीगु खःसा दुजलय् गंगादेवी श्रेष्ठ, शान्ता श्रेष्ठ, रिता श्रेष्ठ, विमला कसजु, शर्मिला श्रेष्ठ व उर्मिला श्रेष्ठ च्वनादीगु दु ।
उखे नेवाः पुचः धैलाकुवाया न्याक्वःगु अधिवेशन नकतिनि क्वचाल। पुचःया नायः रमेश श्रेष्ठया अध्यक्षताय् जूगु उगु ज्याझ्वलय् नेवाः देय् दबू झापाया नायः कृष्ण उदास, नेवाः मिसा दबू शान्तिनगरया अध्यक्ष निलम श्रेष्ठपिं पाहां कथं झाःगु खः। ज्याझ्वलय् किरात याकथुङ चुम्लुङया निर्मल आगथुपो, भुजेल सेवा समाजया हरिलाल खवास व गाविस संयन्त्रया दुजः जस आंगथुपोपिंसं भिंतुना बियादीगु खः ।
