नेवाः देय् दबूया निगू क्षेत्रीय मुँज्यापाखें घोषणापत्र जारी
येँ (सन्ध्या टाइम्स)/नेवाःतय् राष्ट्रिय संगठन नेवाः देय् दबूया थ्वहे वंगु ने.सं. ११३१ चउलागा षष्ठि (२०६८ बैशाख १०) कुन्हु नेवाः पुचः बाँकेया ब्वनाय् नेपालगञ्जय् क्वचाःगु मध्यपश्चिमाञ्चल व सुदूरपश्चिमाञ्चलव्यापी मुँज्याय् सहभागी जुयादीपिं मध्यमाञ्चल व सुदूर पश्चिमाञ्चलया थीथी जिल्लाया नेवाः संघ संस्थातय् प्रतिनिधितय्सं संघीय लोकतान्त्रिक गणतन्त्र नेपाल नीस्वनेगु आन्दोलनयात अझ प्रगतिशील, अग्रगमणकारी व जनपक्षीय स्वरुप दयेका यंकेगु अभियानय् प्रतिवद्ध जुइगु भावना अभिव्यक्ति याःगु दु ।
नेपाःया आदिवासी जनजाति मध्ये नेवाः समुदायया मंकाः उद्देश्य कथं नेवाः स्वायत्त राज्य नीस्वनाः थःपिनि आदिभूमि नेपालमण्डल लागा दुने अग्राधिकार व आत्मनिर्णयया अधिकार सहितया राज्य प्राप्त यायेगु नापं मेमेगु प्रदेशय् नेवाःतय् म्हसीका लिसें समानुपातिक प्रतिनिधित्व व नेवाः बाहुल्यता दुगु लागा व थासय् विशेष स्वायत्त लागा नीस्वनाः हरेक तह व तप्काया नेतृत्व प्रदान यायेगु, नीति निर्माण यायेगु अधिकार सुनिश्चित यायेगु अभियान न्ह्याकेगु लागिं माःकथंया पलाः ल्ह्वनेत नेवाः देय् दबूया नेतृत्वय् सकल नेवाःत एकीकृत जुयाः न्ह्यचिलेमाःगु निष्कर्ष नं उगु मुँज्यां पिकाःगु दु ।
संविधानसभापाखें देय्या न्हूगु संविधान निर्माण यानाः जारी यायेगु ई लच्छि जक ल्यंदनिगु इलय् नं प्रमुख राजनीतिक दल दथुइ सैद्धान्तिक असहमतिया कारणं ब्वलंगु विवादं देय्या भविष्य हे अन्धकारय् लानाः गम्भीर परिस्थितिपाखे न्ह्यचिलिगु खतरा खनेदुगुलिं संविधानसभां क्वःछिनातःगु इलय् जनआन्दोलनया उपलब्धियात संस्थागत यानाः संघीय लोकतान्त्रिक गणतन्त्र नेपाःया संविधान जारी यायेमाः धकाः नं घोषणा पत्रय् न्ह्यथनातःगु दु ।
शान्ति प्रक्रियायात तार्किक निष्कर्षय् थ्यंकाः देशय् शान्ति व अमनचयन, शान्ति सुरक्षा कायम यायेमाः धइगु मंकाः भावनायात मनन् यानाः गुगु नं त्वहः तयाः संक्षिप्त, पूमवंगु संविधान जारी यायेगु षडयन्त्र यात धाःसा उकियात घोर भर्त्सना यायेगु जुइ धकाः नं घोषणा पत्रय् न्ह्यथनातःगु दु। नापं नेवाःतय् अधिकार सुनिश्चित मजुइगु संविधान नेवाः समुदाययात स्वीकार्य जुइमखु व उकिया लिच्वः कथं उकिया विरोधय् नेवाः समुदायपाखें कडा प्रतिवाद यायेगु ब्यहोरा वर्तमान राज्यसत्ता, मुक्कं राजनीतिक दल व संविधान सभाया सभासद्तय् ध्यानाकर्षण यायेगु ज्या थ्वहे घोषणापत्रपाखें यानातःगु दु ।
