मत खुइम्ह माओवादी सभासद ज्वन
येँ (सन्ध्या टाइम्स)/एकीकृत माओवादीया सभासद् इन्द्रमती यादवयात बिजुली मत खुया कयाच्वंगु इलय् हे क्वाःक्वाः ज्वंगु दु। समानुपातिकपाखें सभासद् जुयादीम्ह यादवयात प्रहरीं ज्वनाः स्वद्वः तका बं पुइकाः त्वःतूगु खः। जनतां लोडसेडिङया मार फयेमालाच्वंगु व उर्जा संकटकाल धकाः माओवादी समेत दुथ्याःगु सरकारं घोषणा याना तःगु अवस्थाय् स्वयं सत्तारुढ पार्टीया सभासदं हे मत खुइगु ज्या यानाच्वंगु खँ न्यनाः कपिलवस्तुया स्थानीय मनूत अजूचाःगु दु ।
कपिलवस्तु जिल्लाया सभासद् यादवयात म्हिगः प्रहरी व विद्युत प्राधिकरणया मंकाः पुचलं ज्वंगु खँ अनया प्राधिकरणया कार्यकारी निर्देशक जिवेन्द्र झां कनादीगु दु। थौं संसदया प्राकृतिक स्रोत साधन समितिइ उर्जामन्त्री गोकर्ण बिष्टं थुकिया जानकारी बियादीगु खः ।
