समाचार बीपिं हे समाचार जुसेंलि......
येँ (सन्ध्या टाइम्स)/नेपाः जक मखु विश्वया हे समाचार प्रशारण यायेगु नापं प्रकाशन यायेगु ज्या यानाच्वंपिं नेपाःया पत्रकारत थःहे समाचार जुया बिउगु खनाः मनूत अजूचाःगु दु ।
न्ह्यागु देशय् नं पत्रकार धइपिंत राज्यया प्यंगूगु अंग कथं नालातःगु दइ। नेपाःया राजनीतिक हिउपाः नापनापं समाज रुपान्तरणया नितिं महत्वपूर्णगु भूमिका म्हितीपिं छगू कथं स्वंगःगू मिखाया रुपय् पत्रकारतय्त कयातःगु खः ।
व हे पत्रकारतय् दथुइ नं ल्वापु जुयाच्वंगु समाचार पिहां वयेवं सर्वसाधारण मनूत अजूचाइगु स्वाभाविक हे खः। नेपाःया पत्रकारतय्गु मंकाः संगठन नेपाल पत्रकार महासंघया महाधिवेशन न्ह्यः पत्रकार महासंघया केन्द्रीय ज्याकू संचारग्रामय् म्हिगः पत्रकारतय् दथुइ ल्हाःल्हाः तयाः ल्वापु जूगु खः ।
उगु ल्वापुइ लानाः छम्ह मिसाम्ह पत्रकारयात अस्पतालय् तकं भर्ना यायेमाल। कास्कीया पत्रकारतय्सं जिल्ला अधिवेशन बैधानिक रुपं यायेमाःगु माग यासें महासंघ ज्याकुथी आमरण अनसन च्वनेगु नापं ज्याकुथिइ तालं ग्वयेगु ज्या याना बीवं महासंघया नेतृत्वं ताः चायेकेत्यंगु इलय् उकथं ल्वापु जूगु खः ।
थौं नं पत्रकारत अन आमरण अनसन च्वनाच्वंगु दनि। गनं पत्रकार महासंघय् दलतय्गु हस्तक्षेप, श्रमिक पत्रकारत सिबें गैर पत्रकार व साहुत अप्वः हावी जूगुलिं जकं अथे पत्रकारतय् दथुइ ल्वापु जूगु मखुला धकाः मनूतय्सं टिप्पणी यानाहःगु दु ।
