सुनामिपीडितया नामय् स्वयम्भुइ देवा
येँ (सन्ध्या टाइम्स)/विश्व बौद्ध भातृत्व संघया आह्वान व धर्मोदया सभाया ग्वसालय् जापानय् छुं ई न्ह्यः वःगु तःभुखाय् व सुनामिं जापानी जनतायात जूगु तःधंगु धन जन क्षतिं मुक्त जुइ फयेमा व मदुपिं जापानी नागरिकत याकनं सुखावति भुवनय् वास लायेमा धइगु कामना यासें स्वयम्भूइ न्याद्वःप्वाः देवा च्याकेगु ज्या जुल ।
मू पाहां जापानी राजदूत मिजिकों सीपिनि नामं समवेदना प्वंकुसें नेपाःमित तसकं भाग्यमानी खः छाय्धाःसां सुनामि थेंज्याःगु दुर्घटनां न्ह्याबलें सुरक्षित जुयाच्वने दु धयादिल। वय्कलं नेपाः थेंजाःगु सुन्दर शान्त देशनाप लिसपा थ्यंकं जापानया मित्रता कायम जुयाच्वने दयेमा धकाः नं कामना यानादिल ।
ज्याझ्वलय् विश्व बौद्ध भातृ संगठन उपाध्यक्ष नापं धर्मोदय सभाया उपाध्यक्ष पद्मज्योति कंसाकार, भिक्षु कालसंग लामा, विश्व बौद्ध भातृ संगठनया उपाध्यक्ष आआर्य कर्मा साङपा शेर्पा, धर्मोदय सभाया महासचिव सुचित्रमान शाक्य, लक्ष्मीदास मानन्धर, प्रा. वज्रराज बज्राचार्य लगायत आपालं भिक्षुभिक्षुणी व उपासक उपासिकापिसं ब्वति कयादीगु खः। ज्याझ्वलय् भिक्षु रेन्डर लामां शान्ति कामना यासें शान्ति पाठ यानादीगु खःसा अशोकरत्न गुरुजु व मुनिन्द्ररत्न बज्राचार्यपिसं नं स्वस्तिवाचन यानादीगु खः।
अन च्याकूगु देवा छप्वाःया न्यय्तका काःगु खःसा उकिं मुंगु दां दक्वं जापानी पीडितपिनि ग्वाहालि कथं छ्वइगु खँ ग्वसाः खलकं धाःगु दु। देवा महिला बौद्ध समूह पाखें इना बिउगु खः ।
