न्हूगु सरकार गठन बारे नेपाल-कोइराला सहलह
कांग्रेस व एमालेया शीर्ष नेतातय्सं मधेशया मुद्दाय् न्हापा जूगु सहमति स्वयां अप्व लचकता नालेमफइगु निष्कर्ष पिकाःगु दु । निगू दलया शिर्ष नेतात दथुइ बुधवाः जूगु सहलहलय् मधेशवादी दलतय्सं शान्ति प्रक्रिया न्ह्यने यंकेत ग्वहालि यायेमाःगु निष्कर्ष तकं पिकाःगु दु ।
कांग्रेस सभापति गिरिजाप्रसाद कोइराला निवास महारजगंगय् जूगु खँल्हाबंलाय् मधेशवादी दलनाप थ्वस्वयां न्ह्यः जूगु सहमति हे पूर्ण जूगु धासें थप सहमति आवश्यक मजूगु निष्कर्ष पिकाःगु खः । सहलहल यायेत एमाले नेतात माधव नेपाल, भरतमोहन अधिकारी व रघुजी पन्त कोइराला निवास थ्यंकादीगु खः ।
खँल्हाबंला लिपाः संचारकर्मीतय् प्रतिक्रिया बियादिसें एमाले नेता रघुजी पन्तं सहमतिया राजनीति आवश्यक जूगुलिं सहमति यानाः न्ह्याः वनेगु खँ धयादिल । अथेहे कांग्रेसया उपसभापति रामचन्द्र पौडेलं मधेशवादी दलया माग बारे छुं सहलह मजूसां मधेशवादी दलतय् माग थ्व स्वयां न्ह्यः जूगु सहमति हे पूर्ण जूगु धयादिल । वयेकलं मधेशवादी दलत वहे सहमतिया लिधंसाय् माओवादी नेतृत्वया सरकारय् वने ज्यूसाः एमाले सरकारया नेतृत्वया सरकारय् छाये वने मज्यूगु धकाः न्ह्यसः तयादिल ।
थ्वस्वयां न्ह्यः थौं सुथय् एमाले नेता माधव नेपालं प्रधानमन्त्री पुष्पकमल दाहाल प्रचण्डयात नापलानादीगु खः ।
