थौं थासंथासय् मजदूरतय् जुलुस
येँ (सन्ध्या टाइम्स)/थौं १२२ क्वःगु विश्व श्रमिक दिवसया लसताय् नेपाःया मूमू राजनीतिक दलतय्सं येँय् थःपिनि शक्ति प्रदर्शन याःगु दु। राजनीतिया तःधंगु आधार मजदुर नं जुइफु धइगु तायेकाः मूमू दलतसें मजदुर संगठनयात तसकं बः बियाः वयाच्वंगु दु ।
विश्व श्रमिक दिवस हनेगु झ्वलय् थौं सुथय् नेपाल ट्रेड युनियन कांग्रेस स्वतन्त्रपाखें त्रिपुरेश्वरं जुलुस पिकयाः बसन्तपुली सभा यानाः क्वचायेकल। अथे हे एमालेया मजदुर संगठनं नं थौं थाय् थासं जुलुस पिकयाः खुल्लामञ्चय् सभा यायेत्यंगु दु ।
माओवादी मजदुर संगठनं येँया थीथी न्यागू थासं जुलुस पिकयाः भृकुटीमण्डपय् सभा यायेत्यंगु दु। थीथी पार्टीया कवः कथं स्वनातःगु मजदूर संगठनतय्सं थीथी थासय् अलग अलग जुलुस पिकाःसां फुक्कं जुलुसया नारा मू धाःसा 'विश्वया सकलें मजदूरत छप्पँ जु' खः ।
अमेरिकाया शिकागो शहरय् मजदूरतय्सं ८ घण्टा ज्या, ८ घण्टा आरामा धइगु नारा थ्वयेकाः याःगु आन्दोलन सफल जूगुलिं सन् १८९० निसें मे १ तारिखयात मजदूर दिवस कथं हना वयाच्वंगु दु ।
