नागरिक सर्वोच्चताया स्थापना बिना सरकार गठन जुइमखु : वैद्य
एकीकृत नेकपा (माओवादी)या वरिष्ठ नेता मोहन वैद्यं नागरिक सर्वोच्चताया संघर्ष जारी जूगु ईलय् न्हूगु सरकार गठन जुइमफइगु खँ धयादीगु दु ।
बुधवाः येँय् जूगु छगू अन्तक्रियाय् वैद्यं माओवादी प्रतिपक्षय् च्वनेत तयार जूगु धासें उकीया निंतिं न्हापां नागरिक सर्वोच्चता स्थापना जुइमाः धयादिल । माओवादीं सरकार गठन याये मबिल धकाः गलत प्रचार जूगु धासें नेता वैद्यं कांग्रेस-एमालें बहुमत मुंके मफूगु धयादिल । वयेकल माओवादीं लोकतन्त्र संस्थागत यायेत स्वगु खसां राष्ट्रपतिं अप्रत्यासित रुपं नागरिक सर्वोच्चताय् आक्रमण याःगु धयादिल ।
वयेकलं सैन्य सर्वोच्चताया पक्षपोषण याईपिं कांग्रेस व एमालेयात लोकतन्त्रवादी दल धायेगु हैसियत मदुगु द्वपं बियादिल । माओवादीं लोकतन्त्र माने याइमखु धइगु भ्रम ब्वलंकूगु द्वपं ब्यूसें वयेकलं थःगु दल लोकतन्त्रया 'सच्चा पहरेदार' जूगु दाबी यानादिल ।
देय्या आर्थिक, सामाजिक रुपान्तरण प्रकृया देशी-विदेशी प्रतिक्रियावादीतय्त असह्य जूगु धासें वयेकलं माओवादी शान्ति प्रक्रिया व न्हूगु संविधान निर्माण यायेगु ज्याय् प्रतिबद्ध जूगु धयादिल ।
