महासंघया नेतृत्व पदया निंतिं न्याम्हेसिया उम्मेदवारी
नेपाल पत्रकार महासंघया २३क्वःगु महाधिवेशनय् थीथी पदय् जुइगु निर्वाचनया निंतिं थौं उम्मेदवारी दर्ता यायेगु ज्या क्वचाःगु दु । सुथसय् १० बजे निसें सुरु जूगु दर्ताय् महासंघया न्हूगु नेतृत्वया निंतिं न्याम्हेसिनं नां दर्ता याःगु दु ।
अध्यक्ष पदया निंतिं शिव गाउँले, पोषण केसी, केदार कोइराला, डम्बर गिरी व चन्द्रदेव कामतीं उम्मेदवारी बिउगु दु । गाउँले प्रेस चौतारी व क्रान्तिकारी पत्रकार संघया मंकाः उम्मेदवार खःसा केसीं प्रेस युनियनपाखें उम्मेदवारी बियादीगु खः ।
अथेहे उपाध्यक्ष पदया निंतिं गाउँलेया प्यनलं यशोदा तिम्लिसिना, केसीया प्यानलं रमेश विष्ट व स्वतन्त्र रुपं विजयकुमार बर्मां उम्मेदवारी बिउगु दु ।
महासचिव पदय् ओम शर्मा, रामजी दाहाल व दीपक पाठकं उम्मेदवारी बिउगु दु । शर्मा गाउँले व दाहाल केसीया प्यानल याम्ह खः । पाठकं धाःसा स्वतन्त्र रुपं उम्मेदवारी बिउगु खः ।
अथेहे चन्द्रमान श्रेष्ठ, जगत नेपाल, तिलक कोइराला व दिनेश्वर गुप्तां सचिव पदया निंतिं उम्मेदवारी बिउगु दु । गाउँलेया प्यानलं श्रेष्ठं व केसीया प्यानलं नेपालं उम्मेदवारी बिउगु खःसां प्रेस युनियन पाखें हे रामप्रसाद दाहालं नं सचिवया निंतिं उम्मेदवारी बिउगु दु ।
उखे कोषाध्यक्षय् धाःसा प्रेस चौतारी व क्रान्तिकारी दथुइ खँ मिले मजुइवं निगूलिं पुचलं बिस्कं बिस्कं उम्मेदवारी बिउगु दु । चौतारी पाखें शीतल शाह व क्रान्तिकारी पाखें उजिर मगरं उम्मेदवारी बिउगु दु । केसीया प्यानलं धाःसा बृजकुमार यादवं उम्मेदवारी बिउगु दु । उगु हे पदया निंतिं गजेन्द्र बुढाथोकी व नारायण अमृतं नं उम्मेदवारी बिउगु दु ।
प्रेस चौतारी एमाले समर्थित खःसा क्रान्तिकारी माओवादी व युनियन कांग्रेस समर्थित पत्रकारतय् संस्था खः । थुगुसी छुंछुं पद बाहेक प्रेस चौतारी व क्रान्तिकारीं मंकाः कथं प्यानलया घोषणा याःगु खः ।
महासंघया २३क्वःगु महाधिवेशन थ्वहे वैशाख २३ गते निसें येँया प्रज्ञा भवनय् जुइत्यंगु दु ।
