सहमतिया लागिं अधिकतम कुतः या: : मुन
राष्ट्रसंघया महासचिव वानकी मुनं शान्ति प्रक्रिया व संविधान निर्माणया विषयलय् सहमति निर्माण यायेत अधिकतम कुतः यायेत नेपाःया राजनीतिक दलतय्त इनाप याःगु दु ।
शुक्रवाः छगू विज्ञप्ति पिथना महासचिव मुनं न्हूगु संविधान जारी यायेत लच्छिस्वयां म्हो जक ई दुगु अवस्थाय् नं महत्वपूर्ण ज्या याये ल्यँ दनीगु धासें च्यूताः प्वंकादिल । वय्कलं संविधान निर्माणया विषयस ठोस पला ल्ह्वनेत दलतय्त इनाप याःगु दु ।
वय्कलं सरकार व तत्कालीन माओवादी विद्रोही दथुइ न्यादँ न्ह्यः क्वचाःगु गृहयुद्ध लिपा सुरु जूगु शान्ति प्रक्रिया आः निर्णायक मोडय् थ्यंगु खँ विज्ञप्ति न्ह्यथनादीगु दु । लडाकु समायोजन व पुर्नस्थापनाया विषयलय् दलत स्पष्ट जुइमाःगु खँय् नं वय्कलं बः बियादीगु दु ।
मुनं नेपाःया शान्ति प्रक्रियां महत्वपूर्ण उपलब्धीत चूलाकूगु जूसां राजनीतिक दलत दथुइया मतभिन्नताया हुनिं अझ पूवनेमफूगु खँ विज्ञप्ति न्ह्यथनादीगु दु ।
