युवराजयात तेस्रोलिंगीतय् आशिर्वाद
येँ (सन्ध्या टाइम्स)/बेलायतय् युवराज विलियम व वय्कःया मतिनामि केट मिडल्टन दथुइ थौं जुयाच्वंगु इहिपाया लसताय् नेपाःया तेस्रोलिंगीतय्सं नेपाःस्थित बेलायती राजदूतावासय् भिंतुना ज्याझ्वः यायेत्यंगु दु। हिन्दू परम्पराकथं हिजडा नं धाइपिं तेस्रोलिंगीतय्सं आशिर्वाद बीगु भिं धाइगुलिं थौं ब्लु डायमण्ड सोसाइटीया ग्वसालय् नेपाःया तेस्रोलिंगीतय्सं बेलायती दूतावासय् न्हू तिपूयात आशिर्वाद बीत थ्व ज्याझ्वः यायेत्यनागु खँ सोसाइटीया नायः लिसें सभासद् सुनिलबाबु पन्तं 'सन्ध्या टाइम्स'यात कनादिल। दूतावासय् थौं न्हिनय् ३ बजेनिसें थ्व सांगीतिक ज्याझ्वः जुइ ।
भाजु पन्तं कनादी कथं भारतय् न्हापा तेस्रोलिंगीतय्त सकस्यां सम्मान याइगु खःसां बेलायती शासनकालय् तिनि उमित बहिष्करणय् लाका हःगु खः। आः इहिपा यायेत्यंम्ह युवराज विलियमया मदुम्ह मां डायना नं तेस्रोलिंगी व समलिंगी अधिकारया पक्षय् खुले जुयाः लगे जूम्ह जुयाः थःपिंसं थ्व आशिर्वादया ज्याझ्वः यायेत्यनागु खँ नं वय्कलं कनादिल ।
लण्डनय् थौं वय्कःपिनि इहिपा अतिकं धुमधामसाथ जुयाच्वंगु दु। थ्व इहिपायात विश्वया आपालं टेलिभिजन च्यानलतय्सं प्रत्यक्ष प्रशारण यानाच्वंगु दु ।
