एमाले कार्यकर्ता च्वनावंगु बसय् पेट्रोलबम कयेकल
येँ (सन्ध्या टाइम्स)/एमालेया कार्यकर्तात तयाः लिहां वयाच्वंगु छगः यात्रुबाहक बसय् पेट्रोलबम प्रहार याःगु दु।
वंगु चान्हय् महोत्तरी लागाय् म्हमसिउपिं मनूतय्सं न्ह्यानाच्वंगु यात्रुबाहक बसय् उकथं पेट्रोलबम प्रहार याःगु खः ।
पेट्रोलबम कयेकूगु इलय् बस चालक नापं यानाः स्वम्ह यात्रुत घाःपाः जूगु दु। उगु बसय् च्वनाः धनुषाया जनकपुरय् च्वंपिं एमाले कार्यकर्तात जनकपुरं छेँ त्वःताः जलेश्वरपाखे वनाच्वंगु खः। उपिं च्वनावंगु ज. १ ख ५४२ नम्बरया बसय् स्थानीय भोल्टी चोकय् म्हमसिउपिं मनूतय्सं चान्हय् पेट्रोलबम प्रहार याःगु खः। पेट्रोल बमं कयाः बस छगलं च्यानाः ध्वस्त जूगु खँ प्रहरीं न्ह्यथंगु दु। बस मिं नयाः बसया चालक आगेपुरया जयोम राई, सहचालक धनुषाया धर्मेन्द्रकुमार मण्डल व एमाले कार्यकर्ता फेकन राम घाःपाः जूगु दु। उगु घटनाय् लानाः घाःपाः जूपिंत जलेश्वर अस्पतालय् वासः याकातःगु दु ।
थ्व हे दथुइ जनतान्त्रिक तराई मुक्ति मोर्चा राजन पुचलं टेलिफोन यानाः उगु घटनाया जिम्मेवारी थःपिंसं काःगु दु। राजन पुचलं तराई लागाय् थ्व स्वयां न्ह्यः नं थीथी कथंया आतंकपूर्ण ज्या याना वयाच्वंगु दु ।
