जेठ ९गते बजेट महयेत एमाले सभासदतय् सुझाव

नेकपा (एमाले)या नायः नापं जुयादीम्ह प्रधानमन्त्री झलनाथ खनाल नेतृत्वया सरकारं थ्वहे जेठ ९ गते बजेट हयेगु तयारी यानाच्वंगु इलय् उगु हे पार्टीया सभासद्तय्सं धाःसा उकिया विरोध याःगु दु ।

शुक्रवाः च्वंगु एमाले संसदीय दलया मुँज्याय् अधिकांश सभासद्तय्सं बजेटया हुनिं शान्ति व संविधान निर्माणय् अवरोध जुइगु बिचाः प्वंकूगु खः । सभासद्तय्सं विपक्षी दलतय् सहमति बिना बजेट महयेत सरकारयात सुझाव तकं बिउगु दु ।

शान्ति व संविधान प्रति सरकारया ध्यान केन्द्रीत यायेमाःगु धासें सभासद्तय्सं शान्ति प्रक्रियायात तार्किक निष्कर्षय् थ्यंकाः जक बजेट हयेमाःगु बिचाः प्वंकूगु खः । तर प्रधानमन्त्री झलनाथ खनालं धाःसा बजेटं शान्ति व संविधान निर्माणय् छुं लिच्वः मलाइगु धासें जेठ ९ गते हे बजेट हयेगु पाखे सरकारं गृहकार्य यानाच्वंगु धयादिल ।