याकनं हे लोडसेडिङ म्हो जुइ : ऊर्जा मन्त्री

देशय् अत्याधिक लोडसेडिङया हुनिं औद्योगिक क्षेत्र धराशायी जुयाच्वंगु इलय् ऊर्जा मन्त्री गोकर्ण बिष्टं याकनं हे लोडसेडिङ म्हो जुइगु खँ धयादीगु दु ।

रिपोटर्स क्लबं थौं येँय् याःगु छगू साक्षात्कार ज्याझ्वलय् मन्त्री विष्टं लोडसेडिङ म्हो यायेत सरकारं तत्काल याइगु ज्या व ताः ईलय् याइगु ज्याझ्वःया बारे जानकारी बियादिल ।

वय्कलं लोडसेडिङ म्हो यायेत सरकारं बिजुली चुहावट जूगु थाय् लुइकूगु, बिजुली उत्पादन अप्वयेकीगु, बिजुली वितरणय् सुधार यायेगु लगायतया ज्याझ्वः दुगु धयादिल ।

ज्याझ्वलय् खिम्ति भोटेकोशी वितरण लाइन दयेकेगु ज्या जुयाच्वंगु जानकारी नं वय्कलं बियादिल । सरकारं न्यादँया दुने पूर्णरुपं लोडेसेडिङ क्वपालेगु योजना दयेकाच्वंगु धयादिसें वय्कलं बिजुली उत्पादन यायेगु नितिं आवश्यक वातावरण दयेकीगु धयादिल ।