प्रचण्डया प्रस्ताव बहुमतं पारित / वैद्यपाखें फर मत
एकीकृत नेकपा (माओवादी)या नायः पुष्पकमल दाहाल 'प्रचण्डं' शान्ति व संविधानयात केन्द्रीत यानाः न्ह्यब्वयादीगु राजनीतिक प्रस्तावयात केन्द्रीय समितिं बहुमतं पारित याःगु दु ।
माओवादी मुख्यालय पेरिस डाँडाय् शुक्रवाः च्वंगु मुँज्याय् न्वकु मोहन वैद्य 'किरणं' थःगु लिसः बीधुंकाः बहुमत दुजःतय्सं प्रचण्डया प्रस्ताव अनुमोदन याःगु खः । वैद्यया प्रस्ताव अल्मतय् लायेवं वैद्य पक्षधर नेतातय्सं 'नोट अफ डिसेन्ट' च्वःगु दु ।
वैद्यं शान्ति व संविधानया सम्भावना मदुगु धासें तत्काल जनविद्रोहलय् वनेमाःगु राजनीतिक प्रस्ताव न्ह्यब्वःगु खः । नायः व न्वकुया प्रस्तावय् १४७ दुजःतय्सं थःथःगु बिचाः तःगु खः ।
केन्द्रीय समितिया मुँज्यां जेठ १४ गते तक शान्ति व संविधानया पक्षय् थीथी ज्याझ्वः यायेगु, संविधानया एकीकृत मस्यौदा तयार यायेत मेमेगू दलतनाप सहकार्य यायेगु नापं सेना समायोजनया मोडालिटी तयार यानाः सेना समायोजनया ज्या सुरु यायेगु निर्णय याःगु दु ।
