आः हे जनविद्रोह यायेगु अवस्था मदु : प्रचण्ड
एकीकृत नेकपा (माओवादी)या नायः पुष्पकमल दाहाल 'प्रचण्डं' आः हे जनविद्रोह यायेगु अवस्था मदुगु खँ धयादीगु दु । वय्कलं शान्ति व संविधान निर्माणयात तार्किक निष्कर्षय् थ्यंकेमबिउसाः जक जनविद्रोहया लाइनय् वनेमाःगु धयादीगु दु ।
छुं दिं न्ह्यः निसें येँया पेरिस डाँडास्थित माओवादी ज्याकूथीइ च्वनाच्वंगु केन्द्रीय समितिया मुँज्याय् प्रचण्डं आः हे जनविद्रोहया वातावरण तयार मजूनीगु व विद्रोहया तयारी नं मदुगु धासें थुगु अवस्थायात थुइकेत मोहन वैद्य पक्षयात इनाप यानादिल ।
मुँज्याय् फुक्कं केन्द्रीय दुजःतय्सं थःथःगु बिचाः प्वंकेधुंकाः लिसः बीगु झ्वलय् नायः प्रचण्डं जेठ १४ गते संविधानया मस्यौदा जूसां तयार यायेत पार्टी लगेजुइमाःगु खँय् ब: बियादिल । वय्कलं न्वकु वैद्यया प्रस्तावय् दुथ्याःगु सुझावयात थःगु प्रस्तावय् मिले यानाः यंकेगु प्रतिबद्धता नं प्वंकादिल ।
नायः प्रचण्डं लिसः बीधुंकाः थौंया मुँज्या क्वचाःगु दुसाः वैद्यं धाःसा कन्हय् जक लिसः बीगु जूगु दु । वैद्यया लिसः लिपा छगू हे मंकाः प्रस्ताव पारित यायेगु व निगूलिं प्रस्तावयात क्वयेया कमिटिइ सहलह यायेत यंकेगु बारे निर्णय जुइ ।
