प्रधानन्यायाधीशय् रेग्मीया नां सर्वसम्मतं अनुमोदन
व्यवस्थापिका संसद अन्तर्गतया संसदीय सुनुवाई विशेष समितिं प्रधानन्यायाधीशय् खिलराज रेग्मीया नां सर्वसम्मतं अनुमोदन याःगु दु ।
सिंहदरवारय् बिहीवाः च्वंगु विशेष समितिया मुँज्याय् रेग्मी विरुद्ध लाःगु स्वंगू उजुरीलय् सुनुवाई लिपा वय्कःया नां सर्वसम्मतं अनुमोदन याःगु खः । मुँज्याय् रेग्मीं न्यायसम्पादनय् जुइगु ढिलासुस्तीयात चीकेत प्राथमिकता बीगु न्यायीक ज्या प्रारदर्शी यायेगु प्रतिबद्धता प्वंकादिल ।
थः प्रधानन्यायाधीश जुइधुंकाः अदालतया पुनर्संरचना यायेगु व आधुनिकीकरण यायेगु योजना दुगु धयादिसें वय्कलं पदय् दुगु इलय् निर्भिकतापूर्वक ज्या यायेगु धयादिल ।
विशेष समितिं अनुमोदन यायेवं आः वय्कःयात राष्ट्रपतिं प्रधानन्यायाधीशय् नियुक्त यानादी । वय्कःयात वंगु चैत २८ गते च्वंगु संवैधानिक परिषदया मुँज्यां वरिष्ठताया आधारय् प्रधानन्यायाधीशय् सिफारिस याःगु खः । वर्तमान प्रधानन्यायाधीश रामप्रसाद श्रेष्ठया म्याद थ्वहे वइगु बैशाख २२ गते क्वचायेत्यंगु दु ।
