नेवाः-ताम्सालीङ बन्द भव्य सफल
येँ (सन्ध्या टाइम्स)/जेठ १४ गते पूवंगु संविधान जारी यायेमाः धइगु माग यासें म्हिगः नेवाः व ताम्सालीङ जानाः घोषणा याःगु नेवाः प्रदेश व ताम्सालीङ प्रदेश बन्दया ज्याझ्वलं अन्ततः नेपाल बन्द थेंज्याःगु हे रुप काः वन ।
बन्दया झ्वलय् म्हिगः स्वनिगःया नेवाः लागाय् यातायात, पसः, बजाः, शिक्षण संस्था फुक्क हे ठप्प जूगु खःसा स्वनिगलं पिने यातायात बन्द जुल। बन्दया झ्वलय् म्हिगः येँया भोताहिति नापं यलध्वाखा, ग्वार्को, बालकुमारीइ गाडी मोटरसाइकल तोडफोड जूगु दुसा धादिंगबेसी न्यागः बस व धनगढीइ छगः ट्रकय् तोडफोड याःगु दु ।
बन्दया आह्वान याःपिं ३१ म्ह कार्यकर्तातय्त ज्वगु दु। उकी येँय् प्यम्ह, वीरगंजय् झिम्ह, कास्कीइ न्याम्ह व धनुषाय् झिंनिम्ह ज्वंगु खः। नेवाः प्रदेश व ताम्सालीङ प्रदेश निगुलिं जातिया मंकाः संघर्ष समितिं बन्द याःगु खःसा वीरगंज, धनुषा आदि लागा दलित जनजाति पार्टीं बन्द याःगु खः। अथे हे सुदूर पूर्व लागाय् च्वंगु गुंगू जिल्ला स्थानीय लिम्बुवानतय्सं बन्द याःगु खः। उगु बन्दं यानाः धरान, धनकुटा, विराटनगर तकं ठप्प जूवन। थुकिं यानाः म्हिगः मुक्कं नेपाल बन्द थेंज्याःगु हे माहौल जूवंगु खः ।
म्हिगः बन्द ताःलाकेगु लागिं येँ, यल, ख्वप, थिमि, किपू, तोखा, बुंग आदि लागाय् सुथय् हे जुलुस पिकयाः चाःहिउगु खः। न्हिनय् बसन्तपुली सभा यायेत्ययेकाः धकाः वा वयाः समस्या जुल। ग्वसाः खलःपाखें उगु हे सभापाखें बन्द ताःलाकेत ग्वाहालि याःपिं सर्वसाधारण जनतायात सुभाय् बिउगु खः ।
