'जेठ १४ गते न्ह्यः बजेट हयेमते'
प्रतिपक्षय् च्वनाच्वंगु नेपाली कांग्रेस सहित झिंछगू दलं जेठ १४ गते न्ह्यः बजेट महयेत सरकारयात इनाप याःगु दु ।
सिंहदरवारस्थित कांग्रेस संसदीय दलया ज्याकूथीइ थौं च्वंगु झिंछगू दलया मुँज्यां जेठ १४ गते न्ह्यः बजेट हःसा उकिं शान्ति व संविधानयात लिच्वः लाइगु निष्कर्ष पिकाःगु दु । झिंछगू दलं सरकारं शान्ति व संविधानयात छखे लाकेत हे जेठ १४ न्ह्यः बजेट हयेत्यंगु द्वपं बिउगु दु ।
थ्वहे दथुइ झिंछगू दलं जेठ १४ स्वयां न्ह्यः बजेट हयेगु कार्यतालिका हिलेत सभामुख सुभाषचन्द्र नेम्वाङयात ज्ञापनपत्र लःल्हाःगु दु । सिंहदरवारस्थित सभामुखया सभाकक्षय् वनाः झिंछगू दलयापाखें कांग्रेस संसदीय दलया नेता रामचन्द्र पौडेलं ज्ञापनपत्र लःल्हानादीगु खः ।
थौं हे झिंछगू दलं प्रधानमन्त्री झलनाथ खनालयात नं नापलना ज्ञापनपत्र लःल्हाइगु ज्याझ्वः दु । झिंछगू दलं यदि सरकारं थःपिनिगु सुझावयात बेवास्ता याःसा संसदय् सशक्त प्रतिवाद यायेगु खँ धाःगु दु ।
