प्रमं कोइरालायात धाल, 'बजेट हयेत ग्वाहालि यानादिसं'
प्रधानमन्त्री झलनाथ खनालं नेपाली कांग्रेसया सभापति सुशील कोइरालायात सरकारं जेठय् हयेत्यंगु बजेटयात ग्वाहालि यायेत इनाप यानादीगु दु ।
महाराजगञ्जस्थित कोइराला निवास थ्यंकाः प्रधानमन्त्री खनालं सरकारं आर्थिक दँ २०६८/६९या बजेट हयेगु तयारी यानाच्वंगु बारे जानकारी बियादिसें उकि कांग्रेसया ग्वाहालि फ्वनादीगु खः । उगु इलय् कोइरालां बजेटया बारे कांग्रेसया छुं असहमति दुगु धयादिसें उकिया बारे थःपिंसं छगू ज्ञापनपत्र मार्फत स्पष्ट यायेगु धयादिल ।
कांग्रेसया नेतातय्सं थौं हे प्रधानमन्त्री खनालयात नापलाना सरकारं हयेत्यंगु बजेटया बारे कांग्रेसया धारणा सहितया ज्ञापनपत्र लःल्हाइगु ज्याझ्वः दु ।
अथेहे निम्ह नेतात दथुइया खँल्हाबंलाय् शान्ति प्रक्रिया व संविधान निर्माणया विषयलय् नं सहलह जूगु खः । प्रधानमन्त्री खनालं शान्ति प्रक्रिया याकन क्वचायेकेत सरकारं पहल यानाच्वंगु बारे जानकारी बियादीगु खः ।
निम्ह नेतात दथुइ याकनं शान्ति प्रक्रिया क्वचायेकाः संविधान निर्माण यायेगु विषयलय् धाःसा सहमति जूगु धाःगु दु ।
