निर्देशक नियुक्ति विवादं भरतपुर अस्पताल ठप्प
न्हूम्ह कार्यकारी निर्देशक नियुक्तिया विवादया हुनिं चितवनया भरतपुरस्थित वीपी कोइराला मेमोरियल क्यान्सर अस्पताल ठप्प जूगु दु । निला न्ह्यः निसें अस्पतालया कार्यकारी निर्देशक नियुक्त यायेमफेवं अनया कर्मचारीतय्सं हे सेवा ठप्प याःगु दु ।
अस्पतालय् थनिंनिसें आकस्मिक बाहेकया दक्वं सेवा कन्द जूगु दु । अस्पतालय् कार्यरत प्राविधिकतय्सं कार्यकारी निर्देशक नियुक्त यायेगु निंतिं दबाव बिइगु धासें अति संवेदनशील विभाग तकं बन्द याःगु दु ।
उखे अस्पतालय् वासः याकेत वःपिं बिरामी व बिरामीया छेँजःपिंसं अस्पताल परिसरय् प्रदर्शन याःगु दु । इमिसं अस्पतालया प्रशासन कक्ष नापं च्वनाः सेवा सुचारु यायेत धर्ना बियाच्वंगु दु ।
वंगु भदौ २४ गते कार्यकारी निर्देशक डा. भक्तमान श्रेष्ठया स्वदँया पदावधि क्वचायेवं न्हुम्ह कार्यकरी निर्देशकया बारे अस्पताल सञ्चालक समितिं अझ निर्णय यायेमफेवं अन समस्या ब्वलंगु खः । स्वंगू प्रमुख दलतय्सं कार्यकारी निर्देशकय् थः मनू तयेमाःगु अडान कयाच्वंगुलिं सञ्चालक समितिं कार्यकारी निर्देशकया बारे निर्णय यायेमफूगु खः ।
