सहलह जुयाच्वंगु निगुलिं प्रतिवेदनत लित काइगु : नेता गजुरेल
एकीकृत नेकपा माओवादीया केन्द्रीय मुँज्याय् सहलह जुयाच्वंगु नायः पुष्पकमल दाहाल 'प्रचण्ड' व न्वकू मोहन किरण बैद्यया अलग अलग प्रस्तावत लित काइगु माओवादीया छ्यांजे सी.पी. गजुरेलं दावी यानादीगु दु ।
थौं येँय् जूगु छगू ज्याझ्वलय् न्ववानादिसे नेता गजुरेलं केन्द्रीय मुँज्याय् न्ह्यब्वःगु उगु प्रस्तावयात कयाः मत विभाजन मजुइगु खँ धयादिसें गोरखाया पालुङटारय् जूगु विस्तारित मुँज्यापाखें पारित जूगु नीति अःखः सुं नं मवनीगु विश्वास नं प्वंकादिल ।
वंगु शुक्रवाः निसें माओवादीया केन्द्रीय मुँज्याय् नायः प्रचण्ड व न्वकू वैद्यं न्ह्यब्वयादीगु प्रस्तावयात कयाः सहलह जुयाच्वंगु खःसा थौं नं उगु मुँज्यायात निरन्तरता बीगु खँ धाःगु खः । तर थौं नेवाः ताम्सालिङ बन्दया हुनिं थौंया मुँज्या स्थगित याःगु खः । स्थगित जूगु थौंया मुँज्या कन्हय् च्वनीगु खँ धाःगु दु ।
