नेवाः ताम्सालिङ बन्द क्वचाल
नेवाः ताम्सालिङ संयुक्त संघर्ष समितिं याःगु नेवाः ताम्सालिङ प्रदेश बन्दया ज्याझ्वः न्हिनय् ३ बजे क्वचाःगु दु ।
संयुक्त संघर्ष समितिं येँया बसन्तपुली छगू सभा यानाः बन्द क्वचाःगु घोषणा याःगु खः । सभायात नेवाः स्वायत्त राज्य मंकाः संघर्ष समितिया कजि राजभाई जकःमि व ताम्सालिङ स्वायत्त राज्य संयुक्त संघर्ष समितियापाखें कमानिसंह लामां सम्बोधन यानादीगु खः ।
वय्कपिंसं नेवाः व ताम्सालिङं मंकाः कथं याःगु बन्द संघीयता विरोधी व नेवाः व तामाङतय्त ल्वाकेत स्वइपिंत हाथ्या जूगु धयादिल । थौंया बन्द सफलतापूर्वक क्वचाःगु धासें वय्कःपिंसं बन्द ताःलाकेत ग्वाहालि यानादीपिं सकसितं सुभाय् नं बियादिल ।
थ्वस्वयां न्ह्यः थौं सुथंनिसें स्वनिगः लगायत स्वनिगः जःखःया गुंगू जिल्ला पूर्णरुपं बन्द जुल । सुथंनिसें थीथी थासय् स्वत्तःस्फुर्त रुपं पिहांवःपिं नेवाः व ताम्सालिङ प्रदेशया समर्थकतय्सं जुलुस पिथनाः सवारी साधन व बजाः बन्द याकूगु खः ।
बन्दया झ्वलय् येँया कलंकीइ छम्ह व महाराजगञ्जय् प्यम्ह प्रदर्शनकारीतय्त प्रहरीं ज्वनायंकूगु खः । उखे बन्दया अवज्ञा याःगु धासें प्रदर्शनकारीतय्सं धादिङय् छगः बस सहित च्यागः सवारीसाधन तोडफोड यानाबिउगु दु ।
संयुक्त संघर्ष समितिं ईलय् हे संघीय लोकतान्त्रिक गणतान्त्रिक संविधान जारी यायेमाःगु, संघीयता, लोकतन्त्र व गणतन्त्र सुनिश्चि यायेमाःगु, नेवाः ताम्सालिङ अखण्डित प्रदेशया सुनिश्चित यायेमाःगु, नेपाःया आदिवासीया भूमिइ गुगुं नं नामं प्रदेश दयेके मजिउगु नापं थीथी माग यानाः बन्दया आह्वान याःगु खः ।
Related Stories
नेवाः ताम्सालिङ क्षेत्रय् पूर्ण रुपं बन्दया प्रभाव / थीथी थासय् सुथंनिसें जुलुस/ न्याम्हेसित ज्वन थौं नेवाः ताम्सालिङ प्रदेश बन्द बन्द ताःलाकेत स्वनिगःया थीथी थासं मसाल जुलुस नेवाः-ताम्सालिङ बन्दया झ्वलय् जुइगु ज्याझ्वः नेवाः व ताम्सालिङ संघर्ष समितिं मंकाः रुपं आन्दोलन घोषणा धिमे थाना बन्दया प्रचार बन्दया प्रचार यायेत सांस्कृतिक र्याली
