पारसयात हानं अज्याःगु गल्ति मयायेगु भ्वँ च्वकाः त्वःतेत आदेश
टाइगर टप्स गोली काण्डया सम्बन्धय् पुलाम्ह युवराज पारस शाहयात हानं अज्याःगु गल्ती मयायेगु भ्वँ च्वकाः त्वःतेत जिल्ला प्रशासन चितवनं आदेश बिउगु दु ।
सार्वजनिक अपराध तथा सजाय ऐन अन्तर्गत चितवन जिल्ला प्रशासनय् न्ह्यनाचवंगु मुद्दाय् न्ययाधीश प्रमुख जिल्ला अधिकारी बसन्तराज गौतमं थौं भ्वँ च्वकाः त्वःतेत आदेश बिउगु खः । न्यायाधीश गौतमं बादी व प्रतिवादी वकिलतय् बहस न्यनेधुंकाः सार्वजनिक अपराध ऐनया दफा २ (६) बमोजिम हानं अज्याःगु गल्ती मयायेगु भ्वँ च्वकाः त्वःतेत धाःगु खः ।
थौंया इजलासय् उपस्थित मजूम्ह शाह आः भ्वँ यायेगु निंतिं स्वीन्यान्हुया दुने जिल्ला प्रशासन ज्याकूथीइ उपस्थित जुइमाः ।
वंगु मंसिर २५ गते चितवनस्थित टाइगर टप्स होटलय् पारसं कांग्रेस नेतृ सुजता कोइरालाया जिलाजं बंगलादेशी नागरिक रुवेल चौधरीयात गोलीं कयेकूगु खः ।
