नेवाः ताम्सालिङ क्षेत्रय् पूर्ण रुपं बन्दया प्रभाव / थीथी थासय् सुथंनिसें जुलुस/ न्याम्हेसित ज्वन

नेवाः व ताम्सालिङ संयुक्त संघर्ष समितिं थौं आह्वान याःगु बन्दया हुनिं स्वनिगः लगायत झिंस्वंगू जिल्लाय् बन्दया प्रभाव लाःगु दु । स्वनिगःया येँ, यल, ख्वपनापं काभ्रे, दोलखा, रामेछाप, रसुवा, सिन्धुपाल्चोक, नुवाकोट, धादिङ, चित्तवन, मकवानपुर व सिन्धुली जिल्लया जनजीवन पूर्ण रुपं प्रभावित जूगु दु ।

बन्द सफल यायेत थौं सुथंनिसें स्वनिगः व स्वनिग: जःखया थीथी जिल्लाय् जुलुस पिहांवःगु खः । येँया असं, रत्नपार्क, गोंगबु, कलंकी, किपू, मगंबजाः, सातदोबाटो, ख्वपः, धौख्य, पन्ति, सक्व लगायत थासय् 'नेवाः ताम्सालिङ प्रदेश सुनिश्चित या' लगायत थीथी धकाः नारा थ्वयेकाः जुलुस पिहांवःगु खः ।

आः नं नेवाः व ताम्सालिङ संयुक्त संघर्ष समितिया न्ह्यलुवाः, कार्यकर्ता नापं थीथी राजनीतिक दलनाप स्वापू दुपिं जातिय घटकतय् कार्यकर्तात स्वनिगःया मूमू सतकय् च्वनाः बन्द याकाच्वंगु दु । थ्वहे दथुइ बन्द याकेगु झ्वलय् थनया कलंकीइ छम्ह प्रदर्शनकारीयात प्रहरीं ज्वंगु दु । प्रहरीं ताम्सालिङ संयुक्त संघर्ष समिति कर्यकर्ता अमृत तामाङयात ज्वनायंकूगु दु । अथेहे महाराजगञ्जय् नं प्रहरी प्यम्हेसित ज्वनायंकूगु दु ।

बन्दया हुनिं नेवाः ताम्सालिङ क्षेत्रया सवारी साधन ठप्प जूगु दुसाः बजाः, कलकारखाना, उद्योग, स्कूल आदि पूर्णरुपं बन्द जूगु दु ।

संयुक्त संघर्ष समितिं ईलय् हे संघीय लोकतान्त्रिक गणतान्त्रिक संविधान जारी यायेमाःगु, संघीयता, लोकतन्त्र व गणतन्त्र सुनिश्चि यायेमाःगु, नेवाः ताम्सालिङ अखण्डित प्रदेशया सुनिश्चित यायेमाःगु, नेपाःया आदिवासीया भूमिइ गुगुं नं नामं प्रदेश दयेके मजिउगु नापं थीथी माग यानाः बन्दया आह्वान याःगु खः ।

उखे गणतान्त्रिक राष्ट्रिय मञ्चं याःगु बन्दया हुनिं धरान, धनकुटा, भोजपुर, संखुवासभा, तेह्रथुम लगायत पूर्वया जिल्ला नं बन्द जूगु दु । कोसी राजमार्गय् चले जुइगु ताःहाकःगु दुरीया सवारी साधन ठप्प जूगु दु ।

News Location: