'सदांया लागिं विद्रोह त्याग यानागु मखु'
येँ (सन्ध्या टाइम्स)/माओवादी अध्यक्ष प्रचण्डं थःपिंसं विद्रोहया लाइन पूर्ण रुपं त्याग यानागु मखु, आःयात शान्ति व संविधानया लँय् वनेगु, छुं जुयाः उकिं नं ज्या मजुल धाःसा हानं विद्रोहया लँय् वनेगु जुइ धकाः स्पष्ट यानादीगु दु। थौंकन्हय् येँय् न्ह्यानाच्वंगु माओवादीया केन्द्रीय बैठकय् थःपिनि बिचाः स्पष्ट यायेगु झ्वलय् वय्कलं थ्व खँ धयादीगु खः ।
वय्कःया बिचाःलिसे असहमत उपाध्यक्ष मोहन वैद्य पुचलं धाःसा प्रचण्डं सदांया लागिं हे विद्रोहया लाइन त्वःताः शान्ति व सम्झौताया लाइनय् वनेत्यन धकाः आलोचना यानादीगु खः ।
बैठकय् न्ववाइपिं नेतात अझ नं ल्यं दनिगु कारणं थ्व बैठक मेगु निन्हु ताःहाकः जुइफु धाःगु दु। बैठकय् न्ववाःपिं छुं नेतातय्सं अध्यक्ष प्रचण्ड व उपाध्यक्ष वैद्यं थःपिनि दस्तावेजयात संश्लेषण यासें दथुइ लाःगु मेगु हे दस्तावेज तयार यायेमाली धइगु सुझाव नं बिउगु खः ।
