अनुजा प्रकरणं शितल निवास थारान्हुल

येँ (सन्ध्या टाइम्स)/बसय् लूगु ९१ लाख तका दां व हिराया माः लुइकाः नं सम्बन्धित मनूयात लित बिउगु कारणं चर्चाय् वःम्ह धरानया अनुजा बानिया वास्तवय् फय्गं जक जुयाच्वन धइगु खँ खुलासा जुइवं राष्ट्रपति डा. रामवरण यादव झसंग वंगु दु। वय्कलं थ्व प्रकरण बारे पत्रिकाय् समाचार वःगु भरय् फोन यानाः अनुजायात बधाई बियादीगु खः। तर लिपा घटना ला फय्गं जुयाच्वन धइगु खँ पिहां वयेवं राष्ट्रपतिपाखें म्हीग धरान व सुनसरीया सीडीओतय्त स्वापू तयाः घटनाया वास्तविकता बुझे याके बियादीगु खँ सीदुगु दु। घटनायात कयाः दकलय् न्हापां समाचार छापे याःगु राष्ट्रिय न्हिपौ 'कान्तिपुरं' घटनाय् उल्लेखित मनूत फुक्कं फय्गं धइगु पुष्टि जुल धासें उकिया लागिं क्षमा समेत फ्वंगु दु ।

उखे थ्व घटनाया बारे न्हापांगु समाचार छापे याःगु विराटनगरया छगू पत्रिकां थ्व घटनाय् ध्यबा कयागु धाः वःम्ह व बियागु धाः वःम्ह निम्हं मनू वास्तवय् अनुजा हे लानाच्वन धकाः मेगु खण्डन प्रकाशित याःगु दु।
उखे म्हिगः धरानय् प्रहरीपाखें अनुजायात वयागु हे छेँय् तयाः प्रहरीं स्वघौ तक केरकार याःगु दु। अनुजां म्हिगः तक नं थम्हं मखुगु ज्या यानागु धकाः स्वीकार मयाःसां प्रहरीं धाःसा प्रारम्भिक अनुसन्धानपाखें थ्व घटना फय्गं हे खः धइगु पुष्टि जूगु खँ धाःगु दु। प्रहरीं थुकी अझ थप अनुसन्धान यानाच्वंगु दनि। यदि थ्व घटनाया बारे सुनां उजुरी तः वल धाःसा उकी कानुनी कारवाही समेत न्ह्याये फइगु खँ नं धाःगु दु ।
उखे घटनायात फय्गं धकाः छगू लिपा मेगु अनुसन्धानं पुष्टि याःसां राष्ट्रपतियात समेत झंगः लाये फइकथं थज्याःगु घटना अनुजा थेंज्याःम्ह आखः ब्वना मतःम्ह मिसां छाय् यात ले धइगु मेगु न्ह्यसः नं दना वःगु दु। प्रहरी व धरानया पत्रकारतय्सं थज्याःगु ज्या यायेगुली अनुजायात सुनां ग्वाकल, वयागु लिउने सु सु व व थम्हं हे याःगु खःसा छाय् यात ले धकाः मालेगु ज्या नं न्ह्याकाच्वंगु खँ धाःगु दु। घटना फय्गं खः धइगु समाचार पिहां वयेवं अनुजा धाःसा आः थः तताया छेँनं पिहां तकं मवसे फोन समेत अफ यानाः च्वनाच्वंगु दु।