नागरिक संघर्ष समितिपाखें कंसाकारयात हन
येँ (सन्ध्या टाइम्स)/ न्यायया निंतिं नागरिक संघर्ष समितिपाखें नेपाल वायुसेवा निगमया कार्यकारी अध्यक्ष सुगतरत्न कंसाकारयात हन। थनया क्षेत्रपाटी पार्टी पालेसय् सनिवाः सुथय् जूगु छगू समारोहय् वय्कःयात थीथी संघ संस्था व व्यक्तितपाखें खादा व स्वांमाः क्वखायेकाः हनेज्या याःगु खः ।
ज्याझ्वलय् सम्मानित व्यक्तित्व सुगतरत्न कंसाकारं नेपाः गरीब देश मखु धनी देश हे खः धयादिसे थ्व देशयात शासकतय्सं यानाः हे जक गरीब यानातःगु द्वपं बियादिल।
नेवाः स्वायत्त राज्य मंकाः संघर्ष समितिया सचिवालय कजि मल्ल के. सुन्दरं सुगतरत्नयात अख्तियार व लेखा समितिपाखें अन्याय याःगु कारणं अन्यायया विरोधय् देय् न्यंकया न्यायप्रेमि जनता दनावःगु न्ह्यथंसें थ्व इलय् सकल नेवाःतय्सं गौरव तायेकाच्वंगु खँ न्ह्यथनादिल। सभासद् बुद्ध साय्मिं निष्कलंक चरित्रया कारणं आत्मबल बल्लाःम्ह छम्ह नेवाःया स्वाभिमानयात धस्वाकेत न्ह्याःगु आन्दोलन ताःलाःगु खँ कनादिल ।
नेवाः जागरण मञ्च व न्यायया निति नागरिक संघर्ष समितिया संयोजक सुजीव बज्राचार्यया सभापतित्वय् जूगु हना ज्याझ्वलय् थीथी संघ संस्थापाखें दिपंकर श्रेष्ठ, बित्तीय संस्थापाखें राजेन्द्रमान शाक्य, छेँजःपिंपाखें वय्कःया दाजु त्रिलोकरत्न कंसाकार, नेवाः जागरण मञ्चया सचिव विजय कृष्ण श्रेष्ठ, मिसा प्रतिनिधि रेणु तुलाधर, भरतलाल श्रेष्ठ, पवित्र बज्राचार्य, शुभराज शाक्यपिंसं थः थःगु नुगः खँ कनादीगु खः ।
