नेपालय् भारतीय चुनावया प्रतिक्षा

येँ सन्ध्या टाइम्स÷ देशय् न्हूगु सरकार गठन यायेगु ज्याय् माओवादीपाखें छाय् आलटाल यानाच्वंगु जुइ थुकिया लिउने घरेलु जक मखु बाह्य कारण नं दु ।

विज्ञ सूत्रं बिउगु जान-कारी कथं माओवादीं सरकार गठनया ज्याय् आलटाल याना-च्वंगुया छता मू कारण भारतय् जुयाच्वंगु लोकसभाया चुनाव खः । भारतय् चुनाव लिपा सुनां सरकार दयेकी धकाः माओवादीं अध्ययन यानाच्वंगु दावी सूत्रं याःगु दु । यदि सम्भव दत धाःसा माओवादीं भारतय् न्हूगु सरकार मवःतले नेपालय् नं न्हूगु सरकार गठन याके मबीगु रणनीति दयेके फुगु खँ सूत्रं धाःगु दु ।

सूत्रतय्सं बिउगु जान-कारी कथं माओवादीं मधेशी जनअधिकार फोरमयात छुं नं निर्णय यायेत निन्हु प्यन्हु अझ पियादिसँ धकाः इनाप यानाच्वंगु दु । सूत्रया कथं माओवादीं यानाच्वंगु थ्व इनापया अर्थ भारतीय चुनावया लिच्वः स्वयेत हे खः । भारतय् थौं अन्तिम चरणया मतदान जुयाच्वंगु दुसा उकिया लिच्वः छन्हु निन्हुं वइगु खनेदु ।

विज्ञ सूत्रया कथं भार-तय् क्वचाःगु चुनावया नतिजा- पाखें नेपालय् सरकार गठन जुइगु ज्यायात नं लिच्वः लाकीगु सम्भावना दु । माओवादीयात न्हापा भारतीय कम्युनिष्ट पार्टीं ग्वाहालि याःगु खःसां आः माओवादीया छगू लबीं भाजपा लिसे नं स्वापू बांलाकूगु दावी सूत्रया दु ।