न्हूगु बजेटय् गरीब व श्रमिक हितयात प्राथमिकता : प्रम
प्रधानमन्त्री झलनाथ खनालं सरकारं वइगु जेठ ९ गते संसदय् पेश याइगु आर्थिक दँ २०६८/६९या बजेटय् गरीब व श्रमिक हितयात प्राथमिकता बिइगु खँ धयादीगु दु ।
झिंनिक्वःगु मनमोहन अधिकारी स्मृति दिवसया लसताय् मनमोहन प्रतिष्ठानं थौं यलय् ग्वसाःग्वःगु श्रद्धाञ्जली सभाय् प्रधानमन्त्रीं खनालं गरीब व श्रमिकयात प्राथमिकताय् दुथ्याकातःगु बजेट वर्तमान सरकारं हइगु दावी यानादिल । वय्कलं मनमोहन अधिकारीया प्रगतिशील व बांलागु ज्यायात नं बजेटय् दुथ्याकीगु धयादिल ।
प्रधानमन्त्री खनालं झीगु न्ह्यने तःधंगु सम्भावना व हाथ्या दुगु धयादिसें यदि संक्रमणकालयात पाय्छि तरिकां व्यवस्थापन मयासा: देय्यात निकाश बिइमफइगु धयादिल । वय्कलं देय् संक्रमणकालया लिप्पांगु इलय् दुगु धयादिसें संक्रमणकालया मू लक्ष्य शान्ति व संविधान जारी यायेत सरकार लगे जुयाच्वंगु धयादिल ।
