संविधानसभाया म्याद थप यायेमते : मधेसी मोर्चा
संयुक्त लोकतान्त्रिक मधेसी मोर्चां प्रमुख दलत जेठ १४ गते पूर्ण संविधानया पलेसा एकीकृत मस्यौदा पेश यायेत लगे जुयाच्वंगु धासें आपत्ति प्वंकूगु दु ।
सिंहदरवारस्थित तराई मधेश लोकतान्त्रिक पार्टीया संसदीय ज्याकूथीइ थौं च्वंगु मोर्चाया मुँज्यां जेठ १४ गते शान्ति प्रक्रिया क्वचायेकाः संविधान जारी यायेमाःगु निर्णय याःगु दु । अथेहे मोर्चां छुं नं शर्तय् जेठ १४ गते लिपा संविधानसभाया म्याद थप यायेमज्यूगु निर्णय न याःगु दु ।
शान्ति व संविधानया निंतिं दवाव बिइत मोर्चां विराटनगर, जनकपुर, नेपालगञ्ज, वीरगञ्ज, कञ्चनपुर व भौरहवाय् आमसभा यायेगु निर्णय नं याःगु दु ।
अथेहे मोर्चां नागरिकताया आधारय् सरकारं यानाच्वंगु मतदाता नामावली संकलग व राष्ट्रिय परिचयपत्र दयेकेगु ज्या तत्काल दिकेत नं इनाप याःगु दु । वइगु वैशाख १८ गते तक नं सरकारं उगु ज्या मदिकूसाः १९ गते निसें नामावली संकलन ज्याझ्वः अवरोध थनेगु निर्णय नं मोर्चां याःगु दु ।
