बन्द प्रचार यायेत ब्वाँय् वनेगु कासा

येँ (सन्ध्या टाइम्स)/ नेवाः-ताम्सालिङ संयुक्त संघर्ष समितिं आह्वान यानातःगु बैशाख १४ गतेया नेवाः व ताम्सालिङ बन्द ताःलाकेत म्हिगःनिसें स्वनिगःन्यंकं थीथी कथंया ज्याझ्वः यानाः तीब्र रुपं प्रचार प्रसार न्ह्याकूगु दु ।

बन्दया प्रचारात्मक ज्याझ्वः कथं थौं सुथय् एकीकृत नेवाः राष्ट्रिय मुक्ति मोर्चा येँ महानगर पालिका वडा नं. २ पाखें छगू ब्वाकासा यात । लाजिम्पाटं शुरु जूगु उगु कासाय् स्वसःम्हेस्यां ब्वति काःगु खःसा उकी ४० प्रतिशतनवाः मखुपिंसं ब्वति काःगु खः । ३ किलोमिटर दौड कासाय् प्रविण गुरुङ न्हाप लाःगु खःसा लिउ व लियांलिउ छसिकथं रामबहादुर तामाङ व राजेश चन्द लाःगु खःसा मिसापिनिगु ५०० मिटरया ब्वाकासाय् न्हाप लिउ व लियांलिउ अन्जली लामा प्रमिला गुरुङ व सुमिना महर्जन लाःगु खः ।

मस्तय् दथुइ नं जूगु उगु कासाया झ्वलय् दां सिरपाः नापं दसिपौ लःल्हायेगु ज्या थौं हे जूगु दु । अथे हे थौं सनिलय् यलया मंगलबजाः लागां
प्रचार र्‍याली पिकाइगु जूगु दु । उगु प्रचार र्‍याली गाःहिति, च्यासः, त्यागः, लुँखुसि, ओकुबहाः, तंगः, लगंख्यः, कुमारीपाटी, जाउलाख्यः, पूच्व,
छाय्बहाः जुयाः मंगलय् हे थ्यंकाः क्वचायेकीगु ग्वसाः दु । उगु हे कथं थौं हे बहनी एकीकृत नेवाः राष्ट्रिय मुक्ति मोर्चापाखें मसाल जुलुस पिकाइगु ज्याझ्वः दु । अथेहे नेवाः मोर्चां येँया गोलढुंगाय् प्रचारात्मक र्‍याली पिकायेगु ग्वसा: ग्वयातःगु दु । उगु हे कथं नेवाः स्वायत्त राज्य मंका: परिषद् किपूपाखें थौं बहनी किपूया बाघ भैरब लागाय् प्रचारात्मक सभा यायेत्यंगु दु ।