'लोकतान्त्रिक गणतन्त्रयात सुनिश्चित यायेगु ज्या हे मू हाथ्या'
प्रधानमन्त्री झलनाथ खनालं आःया देय्या मू हाथ्या धइगु हे लोकतान्त्रिक गणतन्त्रयात सुनिश्चित यायेगु जूगु धयादीगु दु । वय्कलं दलत दथुइया विमतियात छखे तयाः लोकतान्त्रिक गणतन्त्रयात छप्पँ जुयाः न्ह्यने यंकेमाःगु धयादिल ।
खुक्वःगु लोकतन्त्र दिवसया लसताय् थौं येँया तिंख्यलय् छगू विशेष ज्याझ्वःयात सम्बोधन यानादिसें प्रधानमन्त्री खनालं न्हूगु संविधान निर्माण यानाः लोकतान्त्रिक गणतन्त्रयात संस्थागत यायेमाःगु धयादिल ।
वय्कलं न्हूगु संविधान निर्माणया निंतिं फुक्कं छप्पँ जुइमाःगु खँय् नं बः बियादिल । राजनीतिक सहमित व सहकार्यं जक देय्यात निकास बिइफइगु धयादिसें वय्कलं वर्तमान सरकार शान्ति व संविधानयात निष्कर्षय् थ्यंकेत लगे जूगु धयादिल ।
ज्याझ्वलय् राष्ट्रपति डा. रामवरण यादव, उपराष्ट्रपति परमानन्द झा, सभामुख सुभाषचन्द्र नेम्वाङ, प्रधानन्यायाधीश रामप्रसाद श्रेष्ठ लगायत विशिष्ट व्यक्तितय् ब्वति दुगु खः ।
