थौं खुक्वःगु लोकतन्त्र दिवस
तत्कालीन जुजु ज्ञानेन्द्र शाह जनतया शक्तिया न्ह्यने पुलिं चुइत बाध्य जूगु थौं खुदँ क्यंगु दु । जनताया व्यापक जनप्रदर्शन लिपा ज्ञानेन्द्रं थःनाप दुगु शासन सत्ता जनप्रतिनिधियात लःल्हायेत बाध्य जूगु खः । थौंया हे न्हिस ज्ञानेन्द्रं विघटित प्रतिनिधिसभा पुनःस्थापना याःगु खः ।
न्हय्गू दल व तत्कालीन नेकपा (माओवादी) दथुइ जूगु झिंनिगू बुँदे सहमति लिपा मंकाः कथं आन्दोलनय् कुहांव:पिं नेपाःया राजनीतिक दल व नेपाली जनताया जनदबाव लिपा लोकतन्त्र पलिस्था जूगु खः ।
उगु हे लोकतन्त्रया उपलब्धि धुंका: जनयुद्ध यानाच्वंपिं माओवादी झिदँ लिपा शान्ति प्रक्रियाय् वःगु खः । अथेहे वयां लिपा देशय् ऐतिहासिक संविधानसभाया चुनाव जुल । अले संविधानसभाया न्हापांगु मुँज्यां २३९ न्ह्यःनिसेंया राजतन्त्रात्मक राज्य व्यवस्थायात वंछ्वयाः देशय् गणतन्त्रया घोषणा यात ।
थौं उगु हे संविधानसभाया म्याद फुइत लच्छि जक ल्यँ दनी । तर इलय् हे संविधान वइगु खः वा मखु धइगु विषय अझ नं निश्चित मजूनी । संविधानसभा दुने अझ नं शासकीय स्वरुप, राज्य पुर्नसंरचना व निर्वाचन प्रणाली थज्याःगु गम्भीर विषयलय् सहमति जुइमफुनी ।
जनताया शक्तिं प्राप्त जूगु लोकतन्त्र, गणतन्त्र, संघीयता व धर्मनिरपेक्षता थज्याःगु विषय संस्थात यायेगु खःसा राजनीतिक दलत इमान्दार जुयाः इलय् हे संविधान जारी यायेमाः । इलय् हे संघीय लोकतान्त्रिक गणतन्त्र नेपाःया संविधान जारी जूसाः जक लोकतन्त्र दिवस धाथें हनेगु सार्थकता दइ ।
