माओवादी केन्द्रीय मुँज्या जारी
एकीकृत नेकपा (माओवादी)या केन्द्रीय मुँज्याय् निगू बिस्कं बिस्कं राजनीतिक प्रस्ताव बारे सहलह जुयाच्वंगु दु ।
शुक्रवाः निसें न्ह्याःगु मुँज्याय् नायः पुष्पकमल दाहाल 'प्रचण्ड' व न्वकु मोहन वैद्य 'किरण'या निगू प्रस्तावय् नेतातय्सं थःगु धापू तयेगु ज्या न्ह्यानाच्वंगु दु । मुँज्याय् आः स्थायी समितिया दुजःतय्सं थःगु बिचाः प्वंकाच्वंगु दुसाः वयां लिपा जक केन्द्रीय दुजःतय्सं थःगु बिचाः प्वंकेगु ज्याझ्वः दु ।
नायः प्रचण्डं शान्ति व संविधानयात प्राथमिकता बीमाःगु व उगु खँ सम्भव मजूसाः जक जनविद्रोह यायेमाःगु खँ दुथ्याःगु राजनीतिक प्रतिवेदन न्ह्यब्वःगु खः । न्वकु वैद्यं धाःसा थःगु राजनीतिक प्रतिवेदनय् शान्ति व संविधान असफल जुइधुंकूगुलिं तत्काल जनविद्रोहया निंतिं तयारी यायेमाःगु खँ न्ह्यथनातःगु दु ।
निगू प्रतिवेदनय् नेतातय्सं थःथःगु बिचाः प्वंकेगु ज्या क्वचायेवं नायः प्रचण्ड व न्वकु वैद्यं नेतातय् न्ह्यसःया लिसः बिइगु ज्याझ्वः दु । प्रचण्डया लिसः स्वीकार्य मजूसाः वैद्यं राष्ट्रिय भेला व महाधिवेशनया आह्वान याइगु खँ धाःगु दु ।
