चिधंगु दलतय्सं संसदय् नाराबाजी / हिउँदे अधिवेशन क्वचाल
व्यवस्थापिका संसदया थौं च्वंगु मुँज्याय् चिधंगु दलया प्यम्ह सभासद्तय्सं नाराबाजी यानाः मुँज्या अवरोध यात । नेपाः राष्ट्रिय पार्टीया सभासद् बुद्ध साय्मि, दलित जनजाति पार्टीया विश्वेन्द्र पासवान, संघीय लोकतान्त्रिक मञ्चया रुकमणि चौधरी व स्वतन्त्र सभासद् सदरुल मियाँ थ:पिंसं तःगु मागया बारे सम्बोधन जुइमाःगु माग यासें मुँज्याय् अवरोध याःगु खः ।
मुँज्या सुरु जुइवं नेपाः राष्ट्रिय पार्टीया साय्मिं चिधंगु दलतय् मागया बारे तःधंगु दलतय्सं बेवास्ता याःगु धासें जनताया माग सम्बोधन मयातले आन्दोलन जारी हे तयेगु ख्याच्वः बियादिल ।
वय्कलं न्ववायेधुनेवं वय्कःनापं सभासद्त पासवान, चौधरी व मियाँ संसदय् नाराबाजी याःगु खः । प्यम्ह सभासद्तय्सं आदिवासी जनजाति, दलित, मुस्लिम लगायत सिमान्तकृत समुदायया हक अधिकार सुनिश्चित जुइमाःगु माग यानावयाच्वंगु दु ।
सभामुख सुभाषचन्द्र नेम्वाङं प्यम्ह सभासद्तय्त तःक्व हे मुँज्या अवरोध मयायेत इनाप याःगु खः । सभामुखया इनापयात वेवास्ता यानाः निरन्तर नाराबाजी यानाच्वनेवं नेम्वाङं संसदया हिउँदे अधिवेशन क्वचाःगु घोषणा यानादीगु खः ।
प्रधानमन्त्रीया सिफारिसय् राष्ट्रपति डा. रामवरण यादवं छ्वयादीगु पौ सभामुख नेम्वाङं ब्वनान्यंकेवं अधिवेशन क्वचाःगु खः ।
