'भारतं तप्यंक हे हस्तक्षेप याःगु दु'

येँ (सन्ध्या टाइम्स)/एकीकृत माओवादीया अध्यक्ष प्रचण्डं भारतं नेपाःया आन्तरिक मामिलाय् तप्यंक हे हस्तक्षेप यानाच्वंगु द्वपं बियादीगु दु। नेपाः भ्रमणय् वयाच्वंम्ह भारतया विदेश मन्त्री एमएस कृष्णालिसे थौं सुथय् साढे ८ बजेनिसें भेटवार्ताया झ्वलय् वय्कलं अथे धयादीगु खः।
विदेशमन्त्री कृष्णां माओवादीपाखें भारत विरोधी गतिविधि अप्वयेका हयाच्वंगु खँय् चिउताः प्वंकादीगु खः। येँया द्वारिका होटलय् १ घण्टा जूगु उगु भेटवार्ताय् नेपाःया राजनीतिक अवस्थायात कयाः सहलह जूगु खः ।

भारतया विदेशमन्त्री कृष्णां माओवादी कार्यकर्तातय्सं भारतीय राजदूत राकेश सूदयात अप्पां कयेकेगु निसें लाकामं कयेकेगु अले हाकुगु ध्वाँय् क्यनाः अपमान याःगु खँयात कयाः आपत्ति प्वंकादीगु खः। माओवादी अध्यक्ष प्रचण्डं भारतलिसे आः न्हूगु आधारय् न्हूगु हे कथं एकता याना वनेत थःपिं तयार दु धयादीगु खः। भेटवार्ता लिपा माओवादी नायः प्रचण्डं संचारकर्मीलिसे खँल्हासें कृष्णां माओवादी भारत विरोधी गतिविधिइ न्ह्याः वन धकाः द्वपं बियादीगु खँ स्वीकार यानादीगु दु। थम्हं नं कृष्णायात माओवादी गबलें नं भारत विरोधी मजूगु स्पष्ट यासें नेपाःमि जनता व नेपाःया आन्तरिक राजनीतिइ भारतपाखें तप्यंक हे जुयाच्वनीगु हस्तक्षेपया विपक्षय् जक दुगु अले उकियात विरोध यायेत थज्याःगु ज्याखँत जुइगु जुयाच्वंगु खः धकाः नं स्पष्ट लिसः बियागु खँ कनादीगु दु ।