स्वास्थ्य स्यनावंलिसे सम्पत्तिया तनाव
येँ (सन्ध्या टाइम्स)/तसकं उसाँय् मदयाः अस्पताल भर्ना जुयाच्वंम्ह चमत्कारी आध्यात्मिक नेता साई बाबाया स्वास्थ्यस्थिति स्यनावंलिसे वय्कलं चले यानाच्वंगु सत्य साई बाबा सेन्ट्रल ट्रष्ट कब्जा यायेत जुयाच्वंगु कुतः नं धमाधम तीव्र जुया वःगु दु। करिब ४० हजार करोड तका बराबरया सम्पत्ति दुगु ट्रष्टया नेतृत्व आः साई बाबा धुंकाः सुनां यायेगु धइगु खँय् विवाद जुयाच्वंगु खः। साई बाबा मदयेवं ट्रष्टया न्हूम्ह अध्यक्ष जुइत थौंकन्हय् साई बाबाया काय्चा रत्नाकर (३९ दँ) व साई बाबाया सहयोगी सत्यजित (३३ दँ) या दथुइ तीव्र धेंधेंबल्लाः जुयाच्वंगु दु ।
उखे अस्पताल भर्ना जुयाच्वंम्ह साई बाबाया म्हया प्रमुख अंगतय्सं ज्या मयायेधुंकूगु खँ चिकित्सकतय्सं धाःगु दु। वय्कः अस्पताल भर्ना जुयादीगु थ्व २५ न्हुया दुने वय्कःया तौल घटे जुयाः आः ३२ किलो जक जूवंगु खँ नं अस्पतालं धाःगु दु ।
