बलात्कार यायेत्यंम्ह बाःजुया हत्या
येँ (सन्ध्या टाइम्स)/थः हे भौयात बलात्कार यायेत्यंम्ह छम्ह बाःजुयात भौम्हेस्यां स्याना बिउगु दु। छेँय् काय्म्ह मदुगु पाः लाकाः भौया क्वथाय् दुहां वनाः बलात्कार यायेत्यंगु इलय् भौम्हेस्यां आत्मरक्षाया लागिं जःगु हतियारं प्रहार यानाः बाःजुम्हेसित स्याना बिउगु खः। घटना वंगु चान्हय् डडेल्धुराय् जूगु खः ।
घटना लिपा बाःजु स्याःम्ह भौमचा खगी थामीयात प्रहरीं ज्वंगु दु। ६१ दँ दुम्ह बाःजुम्ह ताराबहादुर थामीं थःत बलात्कार यायेत्यंगु इलय् थम्हं प्रतिकारया झ्वलय् ल्वाभलं पालाबलय् बाःजुया छ्यनय् लानाः सीगु खँ भौम्हेस्यां धाःगु दु ।
म्हिगः बहनी उगु घटना जूगु खःसा भौम्हेसिया प्रहारं बाःजुम्ह घटनास्थलय् हे सीगु खः। काय्म्ह गामय् जूगु छगू इहिपा समारोहय् वनाच्वंगु इलय् उगु घटना जूगु खः। घटना जूगु इलय् छेँय् बाःजु भौ व छय्म्ह जक दुगु खः ।
