हानं विमान न्यायेगु प्रक्रियाय् वने: कंसाकार
येँ (सन्ध्या टाइम्स)/ विशेष अदालतपाखें नकतिनि सफाई प्राप्त यानादीम्ह नेपाल वायुसेवा निगमया कार्यकारी अध्यक्ष सुगतरत्न कंसाकारं आः न्हूगु संचालक समिति व विभागीय मन्त्रीलिसे सहलह यानाः निगमया लागिं न्हूगु एअरबस न्यायेगु ज्या हाकनं न्ह्याकेगु खँ धयादीगु दु ।
अदालतपाखें सफाई प्राप्त जुइवं थौं वय्कःयात बधाई बीत वंगु ललितपुर नागरिक अभियानया दुजःतलिसे खँ ल्हासें वय्कलं थ्व खँ धयादीगु खः ।
अझ नं छुं माफियातय्सं हवाईजहाज न्यायेगु ज्याय् पंगः थनेत स्वयेफु धासें उकियात असफल यायेत नं जनताया दवाव आवश्यक दुगु खँ वय्कलं कनादिल। बांलाःगु ज्या याइपिंत जनताया समर्थन दयाच्वनी धासें वय्कलं थः जेलय् लानाच्वंबलय् न्यायया लागिं क्रियाशील जूगु नागरिक अभियान व यलया थीथी संगठन नापं सकसितं सुभाय् नं बियादिल ।
