दछियंकं जेपी स्कूलया ७३ दँ बुन्हि
येँ (सन्ध्या टाइम्स)/राजधानीया ऐतिहासिक स्कूल जेपी स्कूल ७३ दँय् क्यंगु लसताय् दछियंकं हे थीथी ज्याझ्वः हनेगु ग्वसाः दयेकूगु दु। थ्व झ्वलय् वंगु चैत्र २६ गते थीथी थासय् छगू सफाई अभियान न्ह्याकुसें दछियंकं वनीगु ज्याझ्वःया आरम्भ याःगु दु। येँ मनपाया वातावरण विभाग प्रमुख शान्ताराम पोखरेल व पुलांम्ह मिस नेपाल जेनिशा मोक्तानपिं पाहां कथं वःगु उगु यचुपिचु ज्याझ्वलय् स्कूलया प्रधानाध्यापक सूर्यराज शाक्य, व्यवस्थापन समितिया अध्यक्ष विशुभक्त श्रेष्ठ लगायत स्कूलया शिक्षक व विद्यार्थीतय्सं ब्वति काःगु खः ।
थ्वहे झ्वलय् स्कूलपाखें थौं छगू हिदान ज्याझ्वः यानाच्वंगु दु। बुन्हिया झ्वलय् स्कूलं विज्ञान प्रदर्शनी, देय्न्यंकं न्ह्यसःलिसः, हुलाप्याखं, किपा, निबन्ध व कविता कासा याइगु ग्वसाः दु ।
अथे ०८ सालंनिसें ०३४ साल तक बोर्डय् वःपिं १४ म्ह पुलांपिं विद्यार्थीत व जेपी स्कूलं पास जुयाः राष्ट्रिय व अन्तर्राष्ट्रिय व्यक्तित्व जुइधुंकूपिं व्यक्तितय्त नं हनेगु ज्याझ्वः दयेकूगु दु ।
