न्हय्न्हुं समस्या ज्यनी: प्रचण्ड
य ल(सन्ध्या टाइम्स)/माओवादी अध्यक्ष प्रचण्डं शान्ति व संविधान निर्माणया ज्याय् वयाच्वंगु पंगः आः वइगु न्हय्न्हुया दुने चिला वनीगु खँ कनादीगु दु। व्यावसायिक पत्रकारिता अध्ययन केन्द्रं म्हिगः 'नेपाःया सन्दर्भय् संघीयता' विषयय् याःगु संवाद ज्याझ्वःया उलेज्या यासें प्रचण्डं थ्व खँ कनादीगु खः ।
वय्कलं संविधान दयेकेगु लागिं आः ३५ न्हु ल्यं दनि, तर थःपिंसं न्हय्न्हुया दुने हे सहमति यानाः फुक्क समस्या समाधान यायेगु जुइ धयादिल। शान्ति व संविधान बारे अन्तिम निर्णय यायेत हे थौंकन्हय् थःपिनि पार्टी दुने सहलह जुयाच्वंगु दु धासें अध्यक्ष प्रचण्डं राज्य पुनर्संरचना समितिं न्ह्यब्वःगु १४ प्रदेशया नक्साय् माःसा सुधार याये जिउ धकाः नं धयादिल ।
