प्रचण्डया प्रस्तावय् वैद्यया फरक मत
एकीकृत नेकपा (माओवादी)या नायः पुष्पकमल दाहाल 'प्रचण्डं' न्ह्यब्वयादीगु राजनीतिक प्रस्तावय् न्वकु मोहन वैद्यं फरक मत तःगु दु ।
माओवादीया थनिंनिसें सुरु जूगु केन्द्रीय समितिया मुँज्याय् न्वकु वैद्यं जनविद्रोहयात निरन्तरता बिइमाःगु धासें फरक प्रस्ताव पेश यानादीगु खः । वैद्यं शान्ति व संविधानयात पूवंकेमबीगु षड्यन्त्र जुयाच्वंगुलिं जनविद्रोह यायेमाःगु खँ न्ह्यथनादीगु दु ।
माओवादीया पालुङटारय् च्वंगु विस्तारित मुँज्यां पारित याःगु 'शान्ति स्थापना व संविधान निर्माण मजूसाः जनविद्रोहलय् वनेगु' धकाः पारित याःगु कार्यदिशायात प्रचण्डं त्वःतुगु द्वपं वैद्यं बिउगु दु ।
छुं दिं न्ह्यः च्वंगु पार्टीया पोलिटब्यूरो मुँज्याय् नायः प्रचण्डं शान्ति व संविधानय् केन्द्रीत जुयाः थःगु राजनीतिक प्रस्ताव न्ह्यब्वःगु खः । उगु प्रस्तावयात मेम्ह न्वकु डा. बाबुराम भट्टराई नं धाःसा समर्थन याःगु दु ।
