एमाले नेतृत्वया सरकारयात ग्वहालि यायेत प्रधानमन्त्रीयात नेपालया इनाप
थःगु नेतृत्वय् गठन जुइत्यंगु सरकारयात समर्थन यायेत थीथी दलनाप सहलह यानाच्वंगु नेकपा एमालें थौं प्रधानमन्त्री पुष्पकमल दाहाल प्रचण्ड नाप थ्व इनाप यनादीगु दु । न्हूगु सरकारया नेतृत्वया निंतिं प्रस्तावित एमाले नेता माधवकुमार नेपालं थौं प्रधानमन्त्री प्रचण्ड यात नापलाना न्हूगु सरकारयात ग्वहालि यायेत इनाप यानादीगु खः ।
पुल्चोय् च्वंगु अर्थमन्त्री डा. बाबुराम भट्टराईया निवासय् जूगु खँल्हाबंलाय् नेपालं अधिकांश दलतय्सं एमाले नेतृत्वया सरकारयात ग्वहालि यायेत तयार जूगु धासें माओवादी नेतृत्वयात नं ग्वहालि यायेत इनाप यानादीगु खः । प्रधानमन्त्री प्रचण्डं धासाः एमाले नेतृत्वया सरकार यात ग्वहालि यायेत राष्ट्रपतिया पलाः भिंकेमाःगु व प्रधानसेनापति रुक्मांग कटावलयात कारबाही यायेगु मन्त्रिपरिषदया निर्णय कार्यान्वयन यायेमाःगु प्रस्ताव तयादिल ।
एमाले नेता नेपालं उगु मुद्दा अदालतय् बिचाराधीन जुसां राजनीतिक सहलह यानाः निकास मालेफइगु बीचाः प्वंकादिल । वयेकलं देय्या अभिभारा पूवंकेत सहमति यानाः न्ह्याःवनेत इनाप यानादीगु खः ।
